കരുവന്നൂർ കേസിൽ ഉന്നത സിപിഎം നേതാക്കൾ പ്രതിപ്പട്ടികയിലേക്ക്; രണ്ടാം ഘട്ട പ്രതിപ്പട്ടികയ്ക്ക് അനുമതി നൽകി ഇ ഡി ഹെഡ്ക്വാർട്ടേഴ്‌സ്; കേസിൽ ക്രൈം ബ്രാഞ്ചിന് രൂക്ഷ വിമർശനവുമായി കോടതി

കൊച്ചി: കരുവന്നൂർ നിക്ഷേപത്തട്ടിപ്പ് കേസിൽ ഉന്നത സിപിഎം നേതാക്കൾ പ്രതിപ്പട്ടികയിലേക്ക്. മുൻ മന്ത്രി എ സി മൊയ്‌തീനും മുൻ തൃശ്ശൂർ ജില്ലാ സെക്രട്ടറി എം എം വർഗീസുമാണ് രണ്ടാം ഘട്ട പ്രതിപ്പട്ടികയിൽ ഉൾപ്പെട്ടിട്ടുള്ളത്. ക്രമക്കേടിലൂടെ ലോൺ തരപ്പെടുത്തിയവരും പ്രതികളാകും. രണ്ടാം ഘട്ട പ്രതിപ്പട്ടികയ്ക്ക് ഇ ഡി കേന്ദ്ര ആസ്ഥാനം അനുമതി നൽകി. മൂന്നാം ഘട്ട പ്രതിപ്പട്ടികയ്ക്കു കൂടി അനുമതി ലഭിച്ചാലുടൻ കേസിൽ കുറ്റപത്രം സമർപ്പിക്കും. കേസിലാകെ 83 പ്രതികളുണ്ടാകുമെന്നാണ് സൂചന. മൂന്നാം ഘട്ട പ്രതിപ്പട്ടിക കൂടിയാകുമ്പോൾ കേസിൽ കൂടുതൽ സിപിഎം നേതാക്കൾ പ്രതികളാകും.

കഴിഞ്ഞ ദിവസം സിപിഎം നേതാവും ആലത്തൂർ എം പിയുമായ കെ രാധാകൃഷ്ണനെ ഇ ഡി ചോദ്യം ചെയ്‌തിരുന്നു. മൂന്നാം ഘട്ട പ്രതിപ്പട്ടികയ്ക്ക് അംഗീകാരം ലഭിച്ചാൽ മാത്രമേ രാധാകൃഷ്ണൻ പ്രതിയാകുമോ എന്നറിയാനാകൂ. കെ രാധാകൃഷ്ണൻ സിപിഎം ജില്ലാ സെക്രട്ടറിയായിരുന്ന കാലഘട്ടത്തിലാണ് ക്രമവിരുദ്ധമായ ലോണുകളിൽ ഏറെയും കരുവന്നൂർ ബാങ്കിൽ അനുവദിച്ചത്. എ സി മൊയ്തീന് ശേഷമാണ് കെ രാധാകൃഷ്ണൻ തൃശ്ശൂർ ജില്ലാ സെക്രട്ടറിയായി എത്തിയത്.

അതേസമയം കരുവന്നൂർ കേസിൽ അന്വേഷണത്തിൽ വീഴ്ച വരുത്തിയതിന് രൂക്ഷ വിമർശനവുമായി ഹൈക്കോടതിയും ഇന്ന് രംഗത്ത് വന്നു. നാല് വർഷം എന്ത് ചെയ്‌തു എന്ന് എന്ന് കോടതി ചോദിച്ചു. കേസിൽ ഇതുവരെ കുറ്റപത്രം സമർപ്പിച്ചിട്ടില്ല. എന്നാൽ ഇ ഡി വിശദമായ അന്വേഷണം നടത്തി വിചാരണ തുടങ്ങാനുള്ള ശ്രമത്തിലുമാണ്. കേസിന്റെ രേഖകൾ ഇ ഡി കൊണ്ടുപോയതുകൊണ്ടാണ് കേസന്വേഷണം വൈകുന്നത് എന്നാണ് ക്രൈം ബ്രാഞ്ച് വിശദീകരിച്ചത്.