പറമ്പിൽ അനുവാദമില്ലാതെ വഴികെട്ടിയടച്ചു; വീട്ടമ്മക്ക് അയൽവാസികളുടെ ക്രൂരമർദ്ദനം

ശാസ്താംകോട്ട: നടവഴി കെട്ടിയടച്ചത് ചോദ്യം ചെയ്ത വീട്ടമ്മയെ സംഘം ചേർന്ന് ക്രൂരമായി മർദിച്ചെന്ന് പരാതി. വ്യാപാരി വ്യവസായി ഏകോപനസമിതി ഉള്ളൂരുപ്പ് യൂണിറ്റ് ട്രഷറർ കൂടിയായ പടിഞ്ഞാറെ കല്ലട ഐത്തോട്ടുവ ശങ്കരവിലാസത്തിൽ കുമാരിഷീലയ്ക്കാണ് മർദനമേറ്റത്.

വ്യാഴാഴ്ച രാവിലെ ഒൻപതോടെയായിരുന്നു സംഭവം നടന്നത്. മക്കൾ വിദേശത്തായതിനാൽ വിധവയായ കുമാരിഷീല ഒറ്റയ്ക്കാണ് താമസം. ഇവരുടെ പറമ്പിലൂടെ പ്രധാന റോഡിലേക്ക് ഇറങ്ങുന്നതിന് കനാലിനു കുറുകെ സ്ലാബിട്ട് കാലങ്ങളായി വഴിയുണ്ട്. ഈ വഴി സമീപവാസി കെട്ടിയടച്ചു.ഇത് സംബന്ധിച്ച് നൽകിയ പരാതിയെത്തുടർന്ന് പഞ്ചായത്ത് നിർമാണം വിലക്കുകയും കെട്ടിയഭാഗം പൊളിച്ചുകളയുകയും ചെയ്തിരുന്നതായി കുമാരിഷീല പറഞ്ഞു.

എന്നാൽ സമീപവാസി വീണ്ടും വഴിയടച്ച് മതിൽ കെട്ടുന്നത് കണ്ട് ചോദ്യം ചെയ്തപ്പോൾ മുന്നുപേർ ചേർന്ന് ചവിട്ടി താഴെയിട്ട് ക്രൂരമായി മർദിക്കുകയായിരുന്നെന്നു പരാതിയിൽ പറയുന്നു. കമ്പിപ്പാരപോലുള്ള മരകായുധം ഉപയോഗിച്ച് സമീപവാസി കുമാരി ഷീലയെ ആക്രമിക്കാൻ വന്നുവെന്നും എന്നാൽ കുതറിമാറിയതിനാൽ തലനാരിഴയ്ക്കാണ് താൻ രക്ഷപ്പെട്ടതെന്ന് ഷീല പറയുന്നു. നിലവിൽ ഷീലയുടെ കൈയ്ക്ക് ആഴത്തിൽ മുറിവുണ്ട്. ഇവരെ മർദിക്കുന്നതും തള്ളിയിടുന്നതും സമീപത്തുനിന്ന് ശേഖരിച്ച സിസിടിവി ക്യാമറ ദൃശ്യങ്ങളിലുമുണ്ട്.

സംഭവത്തെ തുടർന്ന് ശാസ്താംകോട്ട പോലീസിൽ പരാതി നൽകിയെങ്കിലും ഇതുവരെയും ശക്തമായ നടപടി സ്വീകരിച്ചിട്ടില്ലായെന്നു കുമാരി ഷീല പറഞ്ഞു.