ചത്ത മാനിനെ കറിവെച്ച് ആഹാരമാക്കി; വനംവകുപ്പ് ഉദ്യോഗസ്ഥരെ സസ്‌പെൻഡ് ചെയ്തു

പാലോട്: പാലോട് വനത്തിനുള്ളിൽ കണ്ടെത്തിയ ചത്ത മാനിനെ കറിവച്ച് ഭക്ഷിച്ച വനംവകുപ്പ് ഉദ്യോഗസ്ഥർക്ക് സസ്പെന്ഷൻ. പാലോട് സെക്ഷൻ ഫോറസ്റ്റ് ഓഫിസർമാരായ അരുണ്‍ ലാല്‍, ബീറ്റ് ഓഫീസറായ എസ് ഷജിദ് എന്നിവരെയാണ് അന്വേഷണ വിധേയമായി സസ്‌പെൻഡ് ചെയ്‌തത്.

കഴിഞ്ഞ മാസം പത്താം തീയതിയാണ് ചത്ത മാനിനെ പാലോട് വനത്തിനുള്ളിൽ കണ്ടെത്തിയത്. തുടർന്ന് ഉദ്യോഗസ്ഥർ ഇതിനെ കറിവച്ച് കഴിക്കുകയായിരുന്നുവെന്നാണ് അന്വേഷണത്തിൽ കണ്ടെത്തിയത്. ഉദ്യോഗസ്ഥരെ സസ്‌പെൻഡ് ചെയ്തുകൊണ്ട് വനംവകുപ്പിറക്കിയ ഉത്തരവിലാണ് ഇക്കാര്യം വ്യക്തമാക്കുന്നത്. അതേസമയം, മാനിനെ ഉദ്യോഗസ്ഥർ തന്നെ അപായപ്പെടുത്തിയതാണോ എന്ന സംശയവും ഉയരുന്നുണ്ട്.

മാനിന്റെ അവശിഷ്ടങ്ങൾ വനത്തിൽ തന്നെ ഉപേക്ഷിച്ചനിലയിലാണ് കണ്ടത്. സംഭവം ശ്രദ്ധയിൽപ്പെട്ട പാലോട് റേഞ്ച് ഓഫീസർ കഴിഞ്ഞയാഴ്ചയാണ് ഉദ്യോഗസ്ഥർക്കെതിരെ നടപടിക്ക് ശുപാർശ ചെയ്തത്. സംഭവം റിപ്പോർട്ട് ചെയ്യുന്നത് വൈകിയതിന് റേഞ്ച് ഓഫീസറെയും, കഴിഞ്ഞ മാസം പത്തിന് ഡ്യൂട്ടിയിലുണ്ടായിരുന്ന മുഴുവൻ ബീറ്റ് ഓഫീസർമാരെയും സ്ഥലം മാറ്റിയതായി റിപ്പോർട്ടുണ്ട്.