പ്രധാനമന്ത്രിക്കെതിരെ അപകീർത്തികരമായ പരാമർശം; ‘എക്‌സ്’ അക്കൗണ്ടുകൾക്ക് ദില്ലി പൊലീസിന്റെ നോട്ടീസ്

ദില്ലി : തലസ്ഥാനത്ത് നടന്ന വിദ്യാർത്ഥി പ്രക്ഷോഭങ്ങൾക്കിടെ പ്രധാനമന്ത്രി നരേന്ദ്രമോദിക്കും സുരക്ഷാ സേനയ്ക്കും എതിരെ അപകീർത്തികരവും അസഭ്യവുമായ പരാമർശങ്ങൾ നടത്തിയ സംഭവത്തിൽ നിരവധി സോഷ്യൽ മീഡിയ അക്കൗണ്ടുകൾക്ക് ദില്ലി പൊലീസ് നോട്ടീസ് അയച്ചു. വാർത്താ പോർട്ടലുകളുടേത് ഉൾപ്പെടെയുള്ള ‘എക്‌സ്’ അക്കൗണ്ടുകൾക്കാണ് നോട്ടീസ് നൽകിയിരിക്കുന്നത്. അതിക്രമപരമായ ഉള്ളടക്കങ്ങൾ പോസ്റ്റ് ചെയ്ത വ്യക്തികളുടെ വിശദാംശങ്ങൾ ലഭ്യമാക്കണമെന്ന് ആവശ്യപ്പെട്ടാണ് പൊലീസിന്റെ ഈ നടപടി.

സമരവുമായി ബന്ധപ്പെട്ട് സോഷ്യൽ മീഡിയകളിൽ പങ്കുവെക്കപ്പെട്ട വീഡിയോകളും പോസ്റ്റുകളും കമന്റുകളും പോലീസ് വിദഗ്ദ്ധമായി പരിശോധിച്ചു വരികയാണ്. മുൻപ് നടന്ന ജന്തർ മന്തർ പ്രതിഷേധം, ജൂലൈ 20-ലെ സൻസദ് ചലോ മാർച്ച് എന്നിവയ്ക്കിടെ പ്രചരിച്ച അധിക്ഷേപകരമായ പോസ്റ്റുകൾ നീക്കം ചെയ്യാൻ വിവിധ സോഷ്യൽ മീഡിയ പ്ലാറ്റ്‌ഫോമുകൾക്ക് നേരത്തെ തന്നെ നിർദ്ദേശം നൽകിയിരുന്നു. നോട്ടീസുകളെ തുടർന്ന് പ്രധാനമന്ത്രിക്കെതിരെയുള്ള നിരവധി ക്രൂഡ് കമന്റുകളും വീഡിയോകളും ഇതിനോടകം നെറ്റിൽ നിന്ന് നീക്കം ചെയ്തിട്ടുണ്ട്.

പ്രക്ഷോഭങ്ങളുമായി ബന്ധപ്പെട്ട് വ്യാജ പ്രചാരണങ്ങളും പ്രകോപനപരമായ വീഡിയോകളും പ്രചരിപ്പിച്ചതിന് പാകിസ്ഥാൻ ബന്ധമുള്ള നാനൂറിലധികം സോഷ്യൽ മീഡിയ അക്കൗണ്ടുകൾ പോലീസ് നേരത്തെ തിരിച്ചറിഞ്ഞിരുന്നു. ദില്ലി പൊലീസിന്റെ സൈബർ വിംഗും സോഷ്യൽ മീഡിയ നിരീക്ഷണ സംഘവും നിലവിൽ ഓൺലൈൻ പ്ലാറ്റ്‌ഫോമുകൾ കർശനമായി നിരീക്ഷിച്ചു വരികയാണ്. നിയമലംഘനം നടത്തുന്ന അക്കൗണ്ടുകൾക്കെതിരെ വരും ദിവസങ്ങളിലും കർശന നടപടി തുടരുമെന്ന് അധികൃതർ വ്യക്തമാക്കി.