പാപ്പരായിട്ടും ഇന്ത്യയെ കുറ്റംപറഞ്ഞു പാകിസ്താൻ; ഐക്യരാഷ്ട്രസഭയിൽ ഉരുളക്കുപ്പേരിപോലെ മറുപടി നൽകി ഇന്ത്യ

ന്യൂഡൽഹി: സ്വന്തം രാജ്യത്തെ ജനങ്ങളുടെ പട്ടിണി മാറ്റാൻ കാശില്ല. ആ അവസ്ഥയിലും ഇന്ത്യയിൽ എന്ത് നടക്കുന്നുവെന്നറിയാനാണ് പാകിസ്താന് താല്പര്യം. ഇപ്പോൾ ഐക്യരാഷ്ട്രസഭയിൽ പാകിസ്താന്റെ പരാമർശങ്ങൾക്ക് മുഖമടച്ച് മറുപടി പറഞ്ഞിരിക്കുകയാണ് ഇന്ത്യൻ പ്രതിനിധികൾ. മനുഷ്യാവകാശ കൗൺസിലിൽ പാകിസ്താന്റെ ആരോപണങ്ങൾക്ക് ഉരുളക്കുപ്പേരിപോലെയാണ് ഇന്ത്യൻ പ്രതിനിധികൾ മറുപടി നൽകിയത്. പാക് പ്രതിനിധി ഹിന റബ്ബാനി ഖാർ രാജ്യത്തിന്റെ പ്രതിരോധ മേഖലയ്‌ക്കെതിരെയായിരുന്നു വിമർശനമുന്നയിച്ചത്. ഇതിന് ചുട്ടമറുപടി തന്നെ ഇന്ത്യൻ പ്രതിനിധി സീമ പൂജാനി നൽകുകയും ചെയ്തു.

ഇന്ത്യയുടെ കാര്യങ്ങളിൽ ഇടപെടാനാണ് പാകിസ്താൻ ഇപ്പോഴും ശ്രമിക്കുന്നത്. ഇന്ത്യയ്‌ക്കെതിരെ അടിസ്ഥാനരഹിതമായ പ്രൊപ്പഗണ്ടകൾ പ്രചരിപ്പിക്കുന്നതിന് പകരം സ്വന്തം രാജ്യത്തെ മുന്നോട്ട് കൊണ്ടുവരാനാണ് പാകിസ്താൻ നേതാക്കൾ ശ്രമിക്കേണ്ടതെന്ന് ഇന്ത്യൻ പ്രതിനിധി സീമ തുറന്നടിച്ചു. പാകിസ്താനിൽ ന്യൂനപക്ഷത്തിനു നേരെ നടക്കുന്ന പീഡനങ്ങൾക്കെതിരെയും ഇന്ത്യ പ്രതികരിച്ചു. പാകിസ്താനിലെ ക്രിസ്ത്യൻ സമൂഹം നേരിടുന്ന അവസ്ഥയെക്കുറിച്ചും പ്രായപൂർത്തിയാകാത്ത പെൺകുട്ടികളെ ഇസ്ലാമിലേക്ക് നിർബന്ധിച്ച് മതം മാറ്റുന്നതിനെതിരെയും ഇന്ത്യൻ പ്രതിനിധികൾ വിമർശിച്ചു.