ദേവഹിതം ജയിച്ചു,ദേവസ്വം ബോർഡ്‌ തോറ്റു!തിങ്കളാഴ്ച നടത്താനിരുന്ന ശുകപുരം ദക്ഷിണാമൂർത്തി ക്ഷേത്രത്തിലെ 187 മരങ്ങളുടെ ലേലം മാറ്റി വച്ചതായി മലബാർ ദേവസ്വം ബോർഡ് ഹൈക്കോടതിയിൽ

കൊച്ചി : ഈ വരുന്ന തിങ്കളാഴ്ച നടത്താനിരുന്ന ശുകപുരം ദക്ഷിണാമൂർത്തി ക്ഷേത്രത്തിലെ 187 മരങ്ങളുടെ ലേലം മാറ്റി വച്ചു. ലേലം തടയണമെന്ന് ആവശ്യപ്പെട്ട് ശങ്കു ടി ദാസ് സമർപ്പിച്ച ഹർജിയിൽ ഹൈക്കോടതി വാദം കേൾക്കവേയാണ് മലബാർ ദേവസ്വം ബോർഡിനുവേണ്ടി ഹാജരായ സ്റ്റാൻഡിങ് കൗൺസിൽ ലേലം നടത്താനുള്ള തീരുമാനം മാറ്റി വെച്ചതായി കോടതിയെ അറിയിച്ചത്.ഇക്കാര്യം ഔദ്യോഗികമായി അറിയിച്ചു കൊണ്ടുള്ള ഉത്തരവും എക്സിക്യൂട്ടീവ് ഓഫീസർ പുറപ്പെടുവിച്ചിട്ടുണ്ട്.

ക്ഷേത്രത്തിന് ചുറ്റുമുള്ള മരങ്ങള്‍ വെട്ടിത്തെളിച്ച് അവിടം കച്ചവട സ്ഥാപനങ്ങളാക്കാനാണ് ദേവസ്വം ബോര്‍ഡിന്‍റെ നീക്കമെന്ന് നേരത്തെ തന്നെ വിമർശനമുയർന്നിരുന്നു. ഇതിനെതിരെയാണ് ഭക്തജനങ്ങൾക്ക് വേണ്ടി അഡ്വ. ശങ്കു ടി ദാസ് ഹൈക്കോടതിയെ സമീപിച്ചത്.ആ നീക്കമാണ് ഇപ്പോൾ വിജയം കണ്ടിരിക്കുന്നത്.

തുടർവാദത്തിന് മുൻപായി കേസിൽ കേരള സർക്കാരിനെയും ജില്ലാ കളക്ടർ ഉൾപ്പെടെയുള്ള ഉദ്യോഗസ്ഥരെയും കൂടി കക്ഷി ചേർക്കും. മാർച്ച്‌ മാസം ഒന്നാം തീയതി കേസ് വീണ്ടും പരിഗണിക്കും. ഇനി കേസിൽ കോടതിയുടെ അന്തിമ തീർപ്പ് വരും വരെ ലേലമോ മരം മുറിയോ നടത്താൻ സാധിക്കുന്നതല്ല.