ജോലി വാഗ്ദാനം ചെയ്ത് യുവതിയ്ക്ക് അശ്ലീല സന്ദേശം; തേവലക്കര സിപിഎം ലോക്കൽ സെക്രട്ടറിയ്ക്ക് സസ്‌പെൻഷൻ

തേവലക്കര: കൊല്ലത്ത് ജോലി വാഗ്ദാനം ചെയ്ത് യുവതിയ്‌ക്ക് ഫോണിൽ അശ്ലീല സന്ദേശം അയച്ച സിപിഎം ലോക്കൽ സെക്രട്ടറിയ്‌ക്ക് സസ്‌പെൻഷൻ. സൗഹൃദം സ്ഥാപിച്ച ശേഷം അശ്ലീല സന്ദേശങ്ങളയച്ചെന്ന യുവതിയുടെ പരാതിയിൽ തേവലക്കര സൗത്ത് ലോക്കൽ കമ്മിറ്റി സെക്രട്ടറിയും ചവറ ഏരിയ കമ്മിറ്റിയംഗവുമായ എസ്.അനിലിനെയാണ് സസ്‌പെൻഡ് ചെയ്തത്.

ഇടുക്കി സ്വദേശിനിയാണ് ലോക്കൽ കമ്മിറ്റി സെക്രട്ടറിയ്ക്കെതിരെ പരാതി നൽകിയത്. സമൂഹമാധ്യമം വഴിയാണ് അനിൽ യുവതിയെ പരിചയപ്പെട്ടത്. തുടർന്ന് ജോലി വാഗ്ദാനം ചെയ്ത് അശ്ലീല സന്ദേശങ്ങൾ അയയ്ക്കുകയായിരുന്നു. പോലീസിൽ പരാതിപ്പെടുന്നതിൽ നിന്ന് യുവതിയെ പിന്തിരിപ്പിച്ച പാർട്ടി നേരിട്ട് അന്വേഷണം നടത്തുകയായിരുന്നുവെന്നാണ് സൂചന. കഴിഞ്ഞദിവസം പോക്സോ കേസിൽ ആലപ്പുഴ ചേർത്തലയിൽ സിപിഎം ബ്രാഞ്ച് സെക്രട്ടറി അറസ്റ്റിലായിരുന്നു. ചേർത്തല നഗരസഭ 33-ാം വാർഡ് സൗത്ത് ബ്രാഞ്ച് സെക്രട്ടറി സുഖലാൽ (58) ആണ് അറസ്റ്റിലായത്. ഇയാളെ പാർട്ടിയിൽ നിന്ന് പുറത്താക്കിയിരുന്നു. അതിനുപിന്നാലെയാണ് വീണ്ടും പാർട്ടിയിലെ മറ്റൊരു അംഗത്തിനെതിരെ പരാതി ലഭിച്ചത്.