ശിവസേനയിലെ തർക്കം ! ഉദ്ധവിന് തിരിച്ചടി ! ഷിൻഡെ വിഭാഗം ഇനി ഔദ്യോഗിക ശിവസേന

ശിവസേനയിലെ ഉദ്ധവ് താക്കറെ, ഏകനാഥ് ഷിൻഡെ വിഭാഗങ്ങൾ തമ്മിലുള്ള അയോഗ്യതാക്കേസിൽ ഏക്നാഥ് ഷിൻഡെയ്ക്ക് അനുകൂലമായി നിയമസഭാ സ്പീക്കറുടെ വിധി. ഷിൻഡെ വിഭാഗമാണ് യഥാർഥ ശിവസേനയെന്നും അദ്ദേഹമാണ് പാർട്ടി നേതാവെന്നും സ്പീക്കർ രാഹുൽ നർവേക്കർ വ്യക്തമാക്കി.ഷിൻഡെ അടക്കം ആദ്യഘട്ടത്തിൽ കൂറുമാറിയ 16 വിമതരെ അയോഗ്യരാക്കണമെന്ന താക്കറെയുടെ ആവശ്യവും തള്ളി. 2022 ജൂണിൽ ഷിൻഡെ നടത്തിയ വിമതനീക്കമാണു ശിവസേനയുടെ പിളർപ്പിനും കോൺഗ്രസും എൻസിപിയും കൂടി ഉൾപ്പെട്ട മഹാ വികാസ് അഘാഡി സർക്കാരിന്റെ പതനത്തിലേക്കും വഴി വച്ചത്

ശിവസേന പ്രമുഖൻ എന്ന നിലയിൽ താക്കറെയുടെ താൽപര്യങ്ങളാണ് പാർട്ടിയുടെ താൽപര്യമെന്ന താക്കറെ വിഭാ​ഗത്തിന്റെ അവകാശവാദം അം​ഗീകരിക്കാനാവില്ലെന്ന് വ്യക്തമാക്കിയ സ്പീക്കർ. ദേശീയ എക്സിക്യുട്ടീവാണ് പരമോന്നത സമിതിയെന്നാണ് ശിവസേനയുടെ ഭരണഘടനയിൽ പറയുന്നതെന്നും ഭൂരിപക്ഷം എംഎൽഎമാരും ഷിൻഡെയ്‌ക്കൊപ്പമായതിനാൽ ഭൂരിപക്ഷ തീരുമാനം പാർട്ടിയുടെ തീരുമാനമായി കണക്കാക്കണമെന്നും ചൂണ്ടിക്കാട്ടി.

ഉദ്ധവ് പക്ഷം തങ്ങളുടെ വാദങ്ങൾക്ക് അടിസ്ഥാനമാക്കിയ 2018ലെ ശിവസേനാ ഭരണഘടന അംഗീകരിക്കാനാകില്ലെന്ന് സ്പീക്കർ പറഞ്ഞു.

“തെരഞ്ഞെടുപ്പു കമ്മിഷനിലെ രേഖകളിൽ 1999ലെ ഭരണഘടനയാണുള്ളത്. അതനുസരിച്ച്, പാർട്ടിയിലെ പ്രതിസന്ധി ഉണ്ടാകുമ്പോൾ കൂട്ടായ തീരുമാനമാണ് എടുക്കേണ്ടത്. എന്നാൽ, 2022ൽ ശിവസേനയിലുണ്ടായ പ്രതിസന്ധി വേളയിൽ കൂട്ടായ തീരുമാനമല്ല ഉണ്ടായത്. ഉദ്ധവ് ഏകപക്ഷീയമായി തീരുമാനങ്ങൾ എടുക്കുകയായിരുന്നു. 1999ലെ ഭരണഘടനയ്ക്ക് വിരുദ്ധമാണിത്. അതിനാൽ ഷിൻഡെയെ നീക്കാൻ ഉദ്ധവിന് അധികാരമില്ല”- സ്പീക്കർ രാഹുൽ നർവേക്കർ പറഞ്ഞു.