കോട്ടക്കലിൽ ഇനിയും ശാഖ നടക്കും; ശാഖനടത്തുന്നത് തടഞ്ഞുകൊണ്ടുള്ള ജില്ലാ മജിസ്‌ട്രേറ്റിന്റെ ഉത്തരവ് തോട്ടിലെറിഞ്ഞ് ഹൈക്കോടതി; ക്ഷേത്രങ്ങളിൽ ആർ എസ് എസ് ശാഖ നിരോധിക്കാൻ ശ്രമിക്കുന്ന സർക്കാരിന് തിരിച്ചടിയായി ഹൈക്കോടതിയുടെ സുപ്രധാന ഉത്തരവ്

കൊച്ചി: കോട്ടക്കൽ ശ്രീ വെങ്കിട്ട തേവർ ക്ഷേത്ര മുറ്റത്ത് വർഷങ്ങളായി നടന്നുവരുന്ന ആർ എസ് എസ് ശാഖ തടയാൻ ഇടത് സംഘടനകൾ നടത്തുന്ന ശ്രമങ്ങൾ വിഫലമായി. ശാഖാ പ്രവർത്തനം 1988 ലെ മത സ്ഥാപനങ്ങളുടെ ദുരുപയോഗം തടയൽ നിയമം അനുസരിച്ച് നിരോധനം ഏർപ്പെടുത്താവുന്ന ഒന്നല്ല എന്ന് ഹൈക്കോടതി നിരീക്ഷിച്ചു. ക്ഷേത്രമുറ്റത്ത് ശാഖ നടത്തുന്നത് തടഞ്ഞുകൊണ്ട് ഫെബ്രുവരി 18 ന് ജില്ലാ മജിസ്‌ട്രേറ്റ് ഉത്തരവിറക്കിയിരുന്നു. ഇത് റദ്ദാക്കിക്കൊണ്ടാണ് ഹൈക്കോടതി വിധിപറഞ്ഞത്. ജില്ലാ മജിസ്‌ട്രേറ്റിന്റെ ഉത്തരവ് നിയമവിരുദ്ധമെന്നാരോപിച്ച് കോട്ടക്കൽ ക്ഷേത്രം ട്രസ്റ്റി ദിലീപ് രാജ നൽകിയ ഹർജ്ജിയിലാണ് ഹൈക്കോടതി വിധിപറഞ്ഞത്.

കഴിഞ്ഞ ഫെബ്രുവരി ആറാം തീയതിയാണ് സിപിഎം, ഡി വൈ എഫ് ഐ പ്രവർത്തകർ, ശാഖ നടക്കുമ്പോൾ ക്ഷേത്ര മുറ്റത്ത് തടിച്ചുകൂടി കൊലവിളി മുദ്രാവാക്യം മുഴക്കി ശാഖ തടസപ്പെടുത്താൻ ശ്രമിച്ചത്. എന്നാൽ ഇടത് സംഘടനാ പ്രവർത്തകരുടെ ഭീഷണിയും മുദ്രാവാക്യം വിളിയും ശ്രദ്ധിക്കാതെ നടപടിക്രമങ്ങൾ പൂർത്തിയാക്കുകയായിരുന്നു കൊച്ചു കുട്ടികൾ പോലും അടങ്ങുന്ന ആർ എസ് എസ് പ്രവർത്തകർ. ഇതിന്റെ വീഡിയോ ദൃശ്യങ്ങൾ സമൂഹമാദ്ധ്യമങ്ങളിൽ വ്യാപകമായി പ്രചരിച്ചിരുന്നു. ദേവസ്വം ബോർഡ് ക്ഷേത്രങ്ങളിൽ നടക്കുന്ന ശാഖാ പ്രവർത്തനം തടയാൻ സർക്കാരിന്റെ നേതൃത്വത്തിൽ തന്നെ ശ്രമങ്ങൾ നടക്കുമ്പോൾ ശാഖാപ്രവർത്തനങ്ങൾ ക്ഷേത്രവിരുദ്ധമല്ലെന്ന ഹൈക്കോടതി വിധി സുപ്രധാനമാണെന്ന് നിയമവിദഗ്ദ്ധർ അഭിപ്രായപ്പെടുന്നു.