അള്ളാഹു മിത്താണെന്ന് പറയാൻ ഷംസീറിന് ധൈര്യമുണ്ടോ ? അങ്ങനെ ചെയ്താൽ കൈ മാത്രമല്ല മറ്റെല്ലാം വെട്ടും; സ്പീക്കർക്കെതിരെ തുറന്നടിച്ച് കെ. സുരേന്ദ്രൻ

തിരുവനന്തപുരം: ഗണപതി ഭഗവാനെ മിത്ത് എന്ന് പറഞ്ഞ സ്പീക്കർ എ.എൻ ഷംസീറിനെതിരെ ആഞ്ഞടിച്ച് ബിജെപി സംസ്ഥാന അദ്ധ്യക്ഷൻ കെ. സുരേന്ദ്രൻ. അള്ളാഹു ഒരു മിത്താണെന്ന് പറയാൻ ഷംസീർ ധൈര്യപ്പെടുമോ ? അങ്ങനെ പറഞ്ഞാൽ ഷംസീറിന്റെ കയ്യ് മാത്രമല്ല മറ്റെല്ലാം വെട്ടും. അളളാഹു മിത്താണെന്ന് പറയാൻ ധൈര്യപ്പെടാത്ത ഷംസീർ എങ്ങനെയാണ് ഗണപതി മിത്താണെന്ന് പറയുകയെന്നും കെ. സുരേന്ദ്രൻ ചോദിച്ചു. തിരുവനന്തപുരത്ത് മാദ്ധ്യമങ്ങളോട് സംസാരിക്കുകയായിരുന്നു അദ്ദേഹം.

മതതീവ്രവാദികൾക്ക് ഊർജ്ജം നൽകുന്ന പ്രസ്താവനകളാണ് സിപിഎം നേതാക്കൾ സ്ഥിരം നടത്തുന്നത്. ഏത് കാര്യത്തിലും ദുഷ്ടലാക്കോടെയാണ് ഇക്കൂട്ടർ പ്രസ്താവന ഇറക്കുന്നത്. ഇതിനെ നേതൃത്വം പ്രോത്സാഹിപ്പിക്കുന്നുവെന്നും ഷംസീറിന്റെ പരാമർശം യാദൃശ്ചികമാണെന്ന് പറയാൻ കഴിയില്ലെന്നും കെ. സുരേന്ദ്രൻ പറഞ്ഞു. മുസ്ലീം സമുദായത്തിന്റെ ആചാരങ്ങളെ പൊക്കിപ്പറയുകയും അതിനെ മഹത്വവ്തകരിക്കുകയും ഹിന്ദുക്കളുടെ ആരാധനാമൂർത്തികൾ എല്ലാം അപരിഷ്‌കൃതമാണെന്ന് വാദിക്കുകയും ചെയ്യുന്നു. ആരാണ് ഇതിന് ഷംസീറിന് അനുമതി നൽകിയതെന്നും കെ. സുരേന്ദ്രൻ ചോദിച്ചു.

കോടാനുകോടി ജനങ്ങളുടെ വിശ്വാസ പ്രമാണത്തിന്റെ ഭാഗമാണ് വിഘ്‌നേശ്വരൻ. ഐഎസ്ആർഒ ഉൾപ്പെടെ, അവരുടെ എല്ലാ നല്ല തുടക്കങ്ങളും ഗണപതി ഹോമവും നാളികേരം ഉടയ്ക്കലിനും ശേഷമാണ് ആരംഭിക്കുന്നത്. അങ്ങനെയുളള പശ്ചാത്തലത്തിൽ ദൈവത്തെ പരസ്യമായി ആക്ഷേപിക്കാനുള്ള ധൈര്യം എങ്ങനെയാണ് ഒരു സിപിഎം നേതാവിന് ലഭിച്ചതെന്നും കെ. സുരേന്ദ്രൻ തുറന്നടിച്ചു. അള്ളാഹു ഒരു മിത്താണെന്ന് ഷംസീർ പറയുമോ? അങ്ങനെ പറഞ്ഞാൽ കയ്യല്ല മറ്റെല്ലാം വെട്ടും. അതാണ് നമ്മുടെ നാട്. എല്ലാ മതഗ്രന്ഥങ്ങളെയും വിമർശിക്കാൻ തയ്യാറാകുന്ന ഷംസീർ എന്തുകൊണ്ടാണ് ഖുർആനെ വിമർശിക്കാത്തത് ? കൂടാതെ, ഷംസീറിന്റെ ധിക്കാരം എന്തുകൊണ്ടാണ് മുഖ്യമന്ത്രി തിരുത്താത്തതെന്നും കെ. സുരേന്ദ്രൻ ചോദിച്ചു.