ഇങ്ങനെ പേടിക്കാതെടാ….! കശ്മീരിലും ഒറ്റയ്ക്ക് മത്സരിക്കാൻ പേടിച്ച് കോൺഗ്രസ് ; ജമ്മു കശ്മീർ നാഷണൽ കോൺഫറൻസുമായി സഖ്യത്തിന് ധാരണ

ശ്രീനഗർ : ജമ്മു – കശ്മീർ നിയമസഭാ തെരഞ്ഞെടുപ്പിലും കോൺഗ്രസ് മത്സരിക്കുന്നത് ഒറ്റയ്ക്കല്ല. ഫറൂഖ് അബ്ദുളളയുടെ ജമ്മു കശ്മീർ നാഷണൽ കോൺഫറൻസുമായിട്ടാണ് കോൺഗ്രസ് നിയമസഭാ തെരഞ്ഞെടുപ്പിൽ മത്സരിക്കുന്നത്. തെരഞ്ഞെടുപ്പ് മുന്നൊരുക്കങ്ങൾ ചർച്ച ചെയ്യാൻ കോൺഗ്രസ് അദ്ധ്യക്ഷൻ മല്ലികാർജ്ജുൻ ഖാർഗെ, പ്രതിപക്ഷ നേതാവ് രാഹുൽ എന്നിവർ കശ്മീരിലെത്തിയിരുന്നു. ഈ കൂടിക്കാഴ്ചയിലാണ് സഖ്യത്തിന് ധാരണയായതെന്ന് ഫറൂഖ് അബ്ദുളള വ്യക്തമാക്കി.

അതേസമയം, സഖ്യത്തിലേക്ക് കൂടുതൽ പാർട്ടികളുടെ സഹകരണം കോൺഗ്രസ് തേടുമോയെന്ന് വ്യക്തമല്ല. കഴിഞ്ഞ ലോക്‌സഭാ തെരഞ്ഞെടുപ്പിൽ 13 പാർട്ടികൾ ചേർന്ന ഇൻഡി മുന്നണിയുടെ ഭാഗമായിട്ടായിരുന്നു കോൺഗ്രസ് മത്സരിച്ചത്. കശ്മീരിലെ 90 സീറ്റുകളിലും സഖ്യമുണ്ടാകുമെന്ന് ഫറൂഖ് അബ്ദുളള വ്യക്തമാക്കി. കൂടാതെ സഖ്യത്തിന്റെ വിശദാംശങ്ങൾ ഉടനറിയിക്കുമെന്നും അദ്ദേഹം കൂട്ടിച്ചേർത്തു.

ഫറൂഖ് അബ്ദുളളയുടെ ശ്രീനഗറിലെ വസതിയിലെത്തിയാണ് അദ്ദേഹവുമായും രാഹുൽ ഗാന്ധിയും മല്ലികാർജ്ജുൻ ഖാർഗെയും കൂടിക്കാഴ്ച നടത്തിയത്. ഇതിന് ശേഷം ശ്രീനഗറിൽ പാർട്ടി പ്രവർത്തകരുടെ യോഗത്തെയും രാഹുൽ ഗാന്ധി അഭിസംബോധന ചെയ്തു. അതേസമയം, ബിജെപി കശ്മീരിൽ ഒറ്റയ്‌ക്കാകും ജനവിധി തേടുകയെന്നു പാർട്ടി സംസ്ഥാന അദ്ധ്യക്ഷൻ രവീന്ദർ റെയ്‌ന കഴിഞ്ഞ ദിവസം തന്നെ വ്യക്തമാക്കിയിരുന്നു.