ഇഷ്ട്ടമുള്ള ഭക്ഷണം വയറുനിറയെ കഴിച്ചോളൂഎളുപ്പത്തിൽ ദഹിപ്പിച്ചു തരാം; കൃത്രിമ നാരുകൾ കണ്ടെത്തി ഗവേഷകർ!

മെൽബൺ : നാരില്ല, എളുപ്പം ദഹിക്കില്ല, പോഷകങ്ങളില്ല തുടങ്ങി ഒത്തിരി കാര്യങ്ങളാൽ നിരവധി ഇഷ്ട ഭക്ഷണങ്ങൾ കഴിക്കാനാകാത്ത ഒത്തിരിയാളുകൾ നമുക്കിടയിലുണ്ട്. ഭക്ഷണങ്ങള്‍ ഇനി രുചി മാറാതെ നാരുകളാല്‍ സമ്പുഷ്ടമാവാനുള്ള കണ്ടുപിടുത്തവുമായി ഒരു കൂട്ടം ഗവേഷകർ. ഓസ്‌ട്രേലിയയിലെ ആര്‍എംഐടി സര്‍വകലാശാലയിലെ ശാസ്ത്രജ്ഞരാണ് ഫൈബര്‍എക്‌സ് എന്ന ഭക്ഷണത്തില്‍ ഉള്‍പ്പെടുത്താവുന്ന കൃത്രിമ നാരുകൾ കണ്ടെത്തിയിരിക്കുന്നത്.

ഫൈബര്‍എക്‌സ് ചേര്‍ക്കുന്നതോടെ ഭക്ഷണങ്ങളുടെ ദഹനം എളുപ്പത്തിലാവുന്നു. കേക്കുകള്‍ മുതല്‍ പിസ വരെയുള്ള നാരു കുറഞ്ഞ ഭക്ഷണങ്ങളില്‍ ഫൈബര്‍എക്‌സിനെ ഉള്‍പ്പെടുത്താനാവും. ഭക്ഷണത്തിന്റെ രുചിയിലും മണത്തിലുമൊന്നും ഫൈബര്‍എക്‌സ് യാതൊരു മാറ്റങ്ങളുമുണ്ടാക്കില്ല . ഇതോടെ ഫലത്തില്‍ നാരു കുറഞ്ഞ ഭക്ഷണങ്ങളെ അതേ രുചിയില്‍ എളുപ്പം ദഹിക്കാവുന്ന ഭക്ഷണമാക്കി മാറ്റാനാകും.

നാരു കുറവുള്ള ഭക്ഷണങ്ങള്‍ രക്തത്തിലെ പഞ്ചസാരയുടെ അളവ് കൂട്ടുകയും അതുവഴി പ്രമേഹ രോഗ സാധ്യത വര്‍ധിപ്പിക്കുകയും ചെയ്യാറുണ്ട്. ഈയൊരു പ്രശ്‌നവും ഫൈബര്‍എക്‌സിന് പരിഹരിക്കാൻ സാധിക്കും. ‌ഒരിക്കല്‍ ഫൈബര്‍എക്‌സ് ഭക്ഷണത്തില്‍ ചേര്‍ത്തു കഴിഞ്ഞാല്‍ നിങ്ങള്‍ക്ക് പ്രത്യേകിച്ച് മാറ്റങ്ങളൊന്നും അറിയാനാവില്ല. ഇനിവേണമെങ്കില്‍ മാതാപിതാക്കള്‍ക്ക് കുട്ടികള്‍ക്ക് ഇഷ്ടമുള്ള ഭക്ഷണത്തില്‍ പോഷകങ്ങള്‍ കൂട്ടിചേര്‍ക്കാനാവുമെന്നും ഫുഡ് ടെക്‌നോളജിസ്റ്റും ആര്‍എംഐടി സര്‍വകലാശാല അസോസിയേറ്റ് പ്രഫസറുമായ അസ്ഗര്‍ ഫറാനാകി പറയുന്നു.

പരീക്ഷണങ്ങളില്‍ നിന്നു ഫൈബര്‍എക്‌സിന്റെ സഹായത്തില്‍ ഭക്ഷണങ്ങളില്‍ രുചിയോ മണമോ വ്യത്യാസം വരാതെ 20 ശതമാനം വരെ നാരുകള്‍ കൂട്ടിച്ചേര്‍ക്കാന്‍ സാധിക്കുമെന്ന് ഗവേഷകര്‍ കണ്ടെത്തിയിരുന്നു