മാസപ്പടിക്കേസിൽ ഇഡി നടപടി ശക്തമാക്കുന്നു! വീണാ വിജയന്റേത് ഉൾപ്പെടെ 242 അക്കൗണ്ടുകളിലെ 18.36 കോടി കണ്ടുകെട്ടും

കൊച്ചി: സിഎംആർഎൽ-എക്‌സാലോജിക് സാമ്പത്തിക ഇടപാട് കേസിൽ മുഖ്യമന്ത്രിയുടെ മകൾ വീണാ വിജയനെ പ്രതിരോധത്തിലാക്കി എൻഫോഴ്‌സ്‌മെന്റ് ഡയറക്ടറേറ്റ് നടപടികൾ കടുപ്പിക്കുന്നു. കേസുമായി ബന്ധപ്പെട്ട് അടുത്തിടെ നടത്തിയ റെയ്ഡുകൾക്ക് പിന്നാലെ മരവിപ്പിച്ച 242 ബാങ്ക് അക്കൗണ്ടുകളിലായുള്ള 18.36 കോടി രൂപ കണ്ടുകെട്ടാനാണ് ഇഡിയുടെ നീക്കം. മരവിപ്പിച്ചവയിൽ വീണാ വിജയന്റെ എച്ച്ഡിഎഫ്‌സി ബാങ്കിലെ അക്കൗണ്ടും ഉൾപ്പെടുന്നുണ്ട്. പണം കണ്ടുകെട്ടുന്നതിനുള്ള ഔദ്യോഗിക റിപ്പോർട്ട് വരും ദിവസങ്ങളിൽ ഇഡി അഡ്ജൂഡിക്കേറ്റിങ് അതോറിറ്റിക്ക് സമർപ്പിക്കും.

കഴിഞ്ഞ ദിവസങ്ങളിൽ നടന്ന റെയ്ഡുകളിൽ പിടിച്ചെടുത്ത മൊബൈൽ ഫോണുകൾ, നിക്ഷേപ രസീതുകൾ, ഡിജിറ്റൽ ഉപകരണങ്ങൾ, സിഎംആർഎല്ലുമായി ബന്ധപ്പെട്ട നിർണായക രേഖകൾ എന്നിവ നിലവിൽ ഉദ്യോഗസ്ഥർ വിശദമായി പരിശോധിച്ചുവരികയാണ്. പിടിച്ചെടുത്ത ഈ ഇലക്ട്രോണിക് ഉപകരണങ്ങളും ബാങ്ക് രേഖകളും തുടർനടപടികൾക്കായി സ്ഥിരമായി കൈവശം വെക്കുന്നതിന് അഡ്ജൂഡിക്കേറ്റിങ് അതോറിറ്റിയുടെ അനുമതി തേടാനും അന്വേഷണസംഘം തീരുമാനിച്ചിട്ടുണ്ട്. ഇതിന് പിന്നാലെ വീണയെ നേരിട്ട് ചോദ്യം ചെയ്യുന്നതിലേക്ക് ഇഡി കടക്കും.

ചോദ്യം ചെയ്യലിന് മുന്നോടിയായി വീണാ വിജയന്റെ ബാങ്ക് ലോക്കറുകൾ പരിശോധിക്കാനാണ് ഇഡി നിലവിൽ ആലോചിക്കുന്നത്. ലോക്കർ പരിശോധന പൂർത്തിയാകുന്ന മുറയ്ക്ക് ചോദ്യം ചെയ്യലിന് ഹാജരാകാൻ ആവശ്യപ്പെട്ട് വീണയ്ക്ക് ഉടൻ തന്നെ സമൻസ് അയക്കും. കേസിൽ സുപ്രീം കോടതിയെ സമീപിക്കാൻ സിഎംആർഎൽ നീക്കം നടത്തുന്നതായി വിവരമുണ്ട്. ഇത് മുൻകൂട്ടി കണ്ട്, കൃത്യമായ ഡിജിറ്റൽ തെളിവുകളോടെ പഴുതടച്ച അന്വേഷണം നടത്താനാണ് ഇഡി ഉന്നതതല യോഗത്തിൽ തീരുമാനിച്ചിരിക്കുന്നത്. അന്വേഷണം എത്രയും വേഗം പൂർത്തിയാക്കാൻ ഇഡി ഡയറക്ടർ ഉദ്യോഗസ്ഥർക്ക് കർശന നിർദേശം നൽകിയിട്ടുണ്ട്.