പാർട്ടിയിലെ പടലപ്പിണക്കം ജനങ്ങളറിയുന്നു;ജനകീയ പ്രതിരോധ ജാഥയിൽ തൃശൂരിൽ ഇപിയെ പങ്കെടുപ്പിച്ച് തടിതപ്പാൻ സിപിഎം

തിരുവനന്തപുരം : പാർട്ടി നേതൃത്വവുമായി അദൃശ്യമായ അകലം പാലിച്ചു നിൽക്കുന്ന എൽഡിഎഫ് കൺവീനർ ഇ.പി.ജയരാജനെ സിപിഎം സംസ്ഥാന സെക്രട്ടറി എം.വി.ഗോവിന്ദൻ നയിക്കുന്ന ‘ജനകീയ പ്രതിരോധ ജാഥ’യിൽ പങ്കെടുപ്പിച്ച് തടിതപ്പാൻ സിപിഎം ശ്രമം. നാളെ തൃശൂരിൽ യാത്രയിൽ ഇപി പ്രസംഗിക്കുമെന്നുമറിയിച്ചിട്ടുണ്ട്. ഇതിനായി ഇപി രാവിലെ തിരുവനന്തപുരത്തുനിന്നു തൃശൂരിൽ എത്തിച്ചേരും. എം.വി.ഗോവിന്ദൻ നയിക്കുന്ന ജാഥയിൽ പങ്കെടുക്കില്ലെന്ന് പറഞ്ഞിട്ടില്ലെന്ന് ഇ.പി.ജയരാജൻ മാദ്ധ്യമങ്ങളുടെ ചോദ്യത്തിന് മറുപടിയായി പറഞ്ഞിരുന്നു.

‘ഞാൻ ജാഥയിൽ അംഗമല്ല. എന്തു കൊണ്ട് പങ്കെടുത്തില്ല എന്ന ചോദ്യം തന്നെ പ്രസക്തമല്ല. എന്നെ ടാർഗറ്റ് ചെയ്യുന്ന മാധ്യമങ്ങളുണ്ട്. അതിന് ചിലർ ഇറങ്ങി പുറപ്പെട്ടിട്ടുണ്ട്. അവർക്ക് ചിലർ ഉപദേശവും നിർദേശങ്ങളും കൊടുക്കുന്നുണ്ട്. അതനുസരിച്ച് ചില മാധ്യമങ്ങൾ വാർത്ത മെനഞ്ഞെടുക്കുന്നുണ്ട്. നിങ്ങൾ മെനഞ്ഞെടുത്താലും പ്രസിദ്ധീകരിച്ചാലും എനിക്ക് ഒരു പ്രശ്നവുമില്ല. എല്ലാവരും പ്രതിരോധ ജാഥയുടെ ഭാഗമാണ്. എല്ലാവരും ജാഥയിൽ പങ്കെടുത്തേ മതിയാകൂ. ജാഥയിൽ പങ്കെടുക്കില്ലെന്ന് പറഞ്ഞിട്ടില്ല.’– ഇ.പി.ജയരാജൻ പറഞ്ഞു.