ഏറ്റുമാനൂർ ഏഴരപ്പൊന്നാന വിവാദം: നേരിട്ട് പരിശോധിച്ച് റിപ്പോർട്ട് നൽകാൻ ഹൈക്കോടതിയുടെ കർശന നിർദ്ദേശം; തിരുവിതാംകൂർ ദേവസ്വം ബോർഡ് ചീഫ് വിജിലൻസ് ആൻഡ് സെക്യൂരിറ്റി ഓഫിസറെ ചുമതലപ്പെടുത്തി

കൊച്ചി : പ്രശസ്തമായ ഏറ്റുമാനൂർ മഹാദേവ ക്ഷേത്രത്തിലെ ചരിത്രപ്രസിദ്ധമായ ‘ഏഴരപ്പൊന്നാന’ നേരിട്ട് പരിശോധിച്ച് റിപ്പോർട്ട് സമർപ്പിക്കാൻ തിരുവിതാംകൂർ ദേവസ്വം ബോർഡ് ചീഫ് വിജിലൻസ് ആൻഡ് സെക്യൂരിറ്റി ഓഫിസർക്ക് നിർദേശം നൽകി ഹൈക്കോടതി. ഏഴരപ്പൊന്നാനയിലെ സ്വർണപ്പാളികൾക്ക് പകരം ചെമ്പ് പോലുള്ള മൂല്യം കുറഞ്ഞ ലോഹങ്ങൾ ഉപയോഗിച്ചെന്ന പരാതി ഉയർന്ന സാഹചര്യത്തിലാണ് ജസ്റ്റിസ് വി. രാജ വിജയരാഘവൻ, ജസ്റ്റിസ് കെ. വി. ജയകുമാർ എന്നിവരുൾപ്പെട്ട ഡിവിഷൻ ബെഞ്ച് വിഷയം ഗൗരവമായി പരിഗണിച്ച് ഈ ഉത്തരവിട്ടത്. ഏഴരപ്പൊന്നാനയ്ക്ക് പുറമെ ക്ഷേത്രത്തിലെ പ്രധാന രജിസ്റ്ററുകളും നേരിട്ട് പരിശോധിക്കണമെന്ന് കോടതി ആവശ്യപ്പെട്ടിട്ടുണ്ട്. കൂടാതെ കൃത്യമായ മൂല്യനിർണ്ണയത്തിനായി ഒരു വിദഗ്ധ സ്വർണപ്പണിക്കാരന്റെ സേവനവും പരിശോധനയ്ക്ക് ഉപയോഗിക്കണമെന്നും ഹൈക്കോടതി പ്രത്യേകം വ്യക്തമാക്കിയിട്ടുണ്ട്.

ഏഴരപ്പൊന്നാന പൊതിഞ്ഞിരുന്ന സ്വർണപ്പാളികളുടെ അറ്റകുറ്റപ്പണികളും നവീകരണ ജോലികളും നടന്ന സമയത്ത്, യഥാർഥ സ്വർണപ്പാളികൾ മാറ്റി പകരം ചെമ്പോ മറ്റ് ലോഹങ്ങളോ സ്ഥാപിച്ചെന്ന ഭക്തന്റെ പരാതിയുടെ അടിസ്ഥാനത്തിലാണ് കോടതി സ്വമേധയാ കേസ് എടുത്തത്. കേസിൽ തിരുവിതാംകൂർ ദേവസ്വം ബോർഡ് സമർപ്പിച്ച സത്യവാങ്മൂലത്തോടൊപ്പം അഡ്മിനിസ്ട്രേറ്റീവ് ഓഫിസറുടെയും അസിസ്റ്റന്റ് ദേവസ്വം കമ്മിഷണറുടെയും റിപ്പോർട്ടുകൾ ഹാജരാക്കിയിരുന്നു. സ്വർണം അപഹരിക്കപ്പെട്ടതായോ അല്ലെങ്കിൽ ക്രമക്കേടുകൾ നടന്നതായോ ഉള്ള യാതൊരുവിധ ഔദ്യോഗിക രേഖകളും നിലവിലില്ലെന്നാണ് ദേവസ്വം ബോർഡ് കോടതിയെ അറിയിച്ചത്. എങ്കിലും ഈ റിപ്പോർട്ടുകളിലെ കണ്ടെത്തലുകളിൽ കൂടുതൽ വ്യക്തത വരുത്തുന്നതിനും ഭക്തരുടെ ആശങ്ക പരിഹരിക്കുന്നതിനുമായാണ് വിശ്വസനീയമായ ഒരു പുതിയ അന്വേഷണത്തിന് ഡിവിഷൻ ബെഞ്ച് ഉത്തരവിട്ടത്. ചീഫ് വിജിലൻസ് ഓഫീസറുടെ നേതൃത്വത്തിൽ നടക്കുന്ന ഈ വിദഗ്ധ പരിശോധനയിലൂടെ മാത്രമേ നൂറ്റാണ്ടുകൾ പഴക്കമുള്ള ഏഴരപ്പൊന്നാനയുടെ സ്വർണ്ണശേഖരത്തെക്കുറിച്ചുള്ള യഥാർത്ഥ വിവരങ്ങൾ പുറത്തുവരുകയുള്ളൂ.