പൗർണ്ണമിക്കാവിൽ മുപ്പത്തിമുക്കോടി ദേവതകളെ പ്രീതിപ്പെടുത്തി പ്രത്യേക പൊങ്കാലയും ലളിത സഹസ്രനാമ ജപവും ! തിങ്കളാഴ്ച നട തുറക്കും

തിരുവനന്തപുരം : വെങ്ങാനൂർ പൗർണ്ണമിക്കാവ് ശ്രീ ബാല ത്രിപുര സുന്ദരി ദേവീ ക്ഷേത്രത്തിൽ പൗർണ്ണമി നാളായ ജൂൺ 29 തിങ്കളാഴ്ച സവിശേഷമായ പൂജാ ചടങ്ങുകളോടെ നട തുറക്കും. പ്രപഞ്ചത്തെ നിയന്ത്രിക്കുന്ന മുപ്പത്തിമുക്കോടി ദൈവങ്ങളെയും പ്രീതിപ്പെടുത്താനായി ആദിശക്തിയുടെ തിരുനടയിൽ അരങ്ങേറുന്ന അപൂർവ്വമായ പൊങ്കാല സമർപ്പണമാണ് ഈ ദിവസത്തെ പ്രധാന ആകർഷണം. രാവിലെ എട്ട് മണി മുതൽ തെരഞ്ഞെടുക്കപ്പെട്ട 33 പേർ 33 പ്രത്യേക കലങ്ങളിലായി തയ്യാറാക്കുന്ന പൊങ്കാല നിവേദ്യം ദേവിക്ക് സമർപ്പിക്കും.

ക്ഷേത്രത്തിലെത്തുന്ന ഭക്തർക്കായി അതിവിപുലമായ ആത്മീയ, സാംസ്കാരിക പരിപാടികളാണ് അന്നേ ദിവസം ഭാരവാഹികൾ ക്രമീകരിച്ചിരിക്കുന്നത്. രാവിലെ എട്ട് മണിക്ക് തന്നെ ദേവീ മാഹാത്മ്യ പാരായണത്തോടെ ചടങ്ങുകൾ ആരംഭിക്കും. തുടർന്ന് ഉച്ചയ്ക്ക് ഒരു മണി മുതൽ പ്രശസ്ത ഭാഗവതാചാര്യൻ പള്ളിക്കൽ സുനിലിന്റെ മുഖ്യ കാർമ്മികത്വത്തിൽ സമൂഹ ലളിത സഹസ്രനാമ ജപം നടക്കും. ഭക്തർക്ക് വ്യക്തിഗതമായോ ഗ്രൂപ്പുകളായോ ഈ സഹസ്രനാമ ജപ യജ്ഞത്തിൽ പങ്കുചേരാവുന്നതാണ്. ഇതിനൊപ്പം രാവിലെ മുതൽ രാത്രി നട അടയ്ക്കുന്നത് വരെ ക്ഷേത്രത്തിന്റെ മുഖമണ്ഡപത്തിൽ വൈവിധ്യമാർന്ന കലാപരിപാടികളും അരങ്ങേറും.

പൗർണ്ണമി ദിനത്തിലെ സവിശേഷമായ ആചാരങ്ങളുടെ ഭാഗമായി രാത്രി ഏഴ് മണി മുതൽ ക്ഷേത്രാങ്കണത്തിൽ ആയോധനകലയായ കളരിപ്പയറ്റും അരങ്ങേറും. ഭക്തജനത്തിരക്ക് കണക്കിലെടുത്ത് തിങ്കളാഴ്ച രാവിലെ നാല് മണി മുതൽ രാത്രി പത്ത് മണി വരെ തുടർച്ചയായി ക്ഷേത്രനട ദർശനത്തിനായി തുറന്നിരിക്കും. തുടർന്ന് രാത്രി പത്ത് മണിക്ക് ഭയഭക്തിനിർഭരമായ വലിയ ഗുരുസി പൂജയോടുകൂടി അന്നത്തെ പൗർണ്ണമി പൂജകൾ സമാപിച്ച് നട അടയ്ക്കും.