കോഴിക്കോട് ചരിത്രത്തിലാദ്യമായി അതിരാത്രം; ഒരുക്കങ്ങൾ അവസാനഘട്ടത്തിൽ

കോഴിക്കോട്: ആചാര്യശ്രീ രാജേഷിന്റെ നേതൃത്വത്തിൽ കാശ്യപ വേദ റിസർച്ച് ഫൗണ്ടേഷൻ സംഘടിപ്പിക്കുന്ന ‘അതിരാത്രം’ യജ്ഞത്തിന് കോഴിക്കോട് വേദിയാകുന്നു. കക്കോടി ഒറ്റത്തെങ്ങിലെ വേദമഹാമന്ദിരത്തിൽ ഏപ്രിൽ 17 മുതൽ 26 വരെയാണ് അതിരാത്രം നടക്കുക. കോഴിക്കോടിന്റെ ചരിത്രത്തിൽ ആദ്യമായാണ് അതിരാത്രം സംഘടിപ്പിക്കപ്പെടുന്നത് എന്ന പ്രത്യേകതയും ഈ ചടങ്ങിനുണ്ട്.

യജ്ഞത്തിനായുള്ള യജ്ഞശാലയുടെ നിർമ്മാണം നിലവിൽ അവസാനഘട്ടത്തിലാണ്. വൈദിക വിധിപ്രകാരമുള്ള ക്രമീകരണങ്ങളാണ് കക്കോടിയിൽ പുരോഗമിക്കുന്നത്. 2014-ൽ 13 ലക്ഷത്തിലധികം പേർ പങ്കെടുത്ത ‘അഗ്നിഷ്ടോമ സോമയാഗ’ത്തിന് ശേഷം കാശ്യപ വേദ റിസർച്ച് ഫൗണ്ടേഷൻ നടത്തുന്ന ഏറ്റവും വലിയ വൈദിക ചടങ്ങാണിത്.

വേദാധികാരം എല്ലാവർക്കുമാണെന്ന സന്ദേശം ഉയർത്തിപ്പിടിച്ചാണ് ഈ അതിരാത്രം സംഘടിപ്പിക്കുന്നത്. ജാതി, മത, ലിംഗ ഭേദമന്യേ ഏവർക്കും യജ്ഞശാലയിൽ പ്രവേശനവും ദർശനവും ഉണ്ടായിരിക്കും. ഭാരതീയ സംസ്കാരത്തിലെ സമത്വദർശനം വിളിച്ചോതുന്ന രീതിയിലാണ് ഇതിന്റെ ക്രമീകരണങ്ങൾ.

യാഗസംസ്കാരത്തിന്റെ ഭാഗമായി ഭാരതത്തിൽ രൂപപ്പെട്ട ഗണിത-ജ്യോതിശാസ്ത്ര വളർച്ചയുടെ ചരിത്രം വ്യക്തമാക്കുന്ന പ്രത്യേക പ്രദർശനം യാഗഭൂമിയിൽ ഒരുക്കും. കൂടാതെ, ഭാവിയിലെ ഗവേഷണ ആവശ്യങ്ങൾക്കായി അതിരാത്രത്തിലെ മുഴുവൻ ചടങ്ങുകളും വീഡിയോയിൽ പകർത്തി സംരക്ഷിക്കാനും സംഘാടകർ തീരുമാനിച്ചിട്ടുണ്ട്.