രാജസ്ഥാൻ റോയൽസിന്റെ റെക്കോർഡ് തകർത്തു; 1.78 ബില്യൺ ഡോളറിന് ആർസിബിയെ ബിർള ഗ്രൂപ്പ് സ്വന്തമാക്കി

ബെംഗളൂരു: ഐപിഎൽ ചരിത്രത്തിലെ സർവ്വകാല റെക്കോർഡ് തുകയ്ക്ക് റോയൽ ചലഞ്ചേഴ്‌സ് ബെംഗളൂരുവിൻറെ (RCB) ഉടമസ്ഥാവകാശം ആദിത്യ ബിർള ഗ്രൂപ്പ് ഉൾപ്പെട്ട സംയുക്ത സംരംഭം സ്വന്തമാക്കി. 1.78 ബില്യൺ ഡോളറിനാണ് (ഏകദേശം 16,700 കോടി രൂപ) ശതകോടീശ്വരൻ കുമാർ മംഗലം ബിർളയുടെ നേതൃത്വത്തിലുള്ള ആദിത്യ ബിർള ഗ്രൂപ്പ്, ടൈംസ് ഓഫ് ഇന്ത്യ ഗ്രൂപ്പ്, അമേരിക്കൻ നിക്ഷേപകൻ ഡേവിഡ് ബ്ലിറ്റ്‌സറുടെ ബോൾട്ട് വെഞ്ചേഴ്‌സ്, ബ്ലാക്ക്‌സ്റ്റോൺ എന്നിവരടങ്ങിയ സഖ്യം ടീമിനെ ഏറ്റെടുത്തത്. ഇതോടെ ഐപിഎല്ലിലെ ഏറ്റവും മൂല്യമുള്ള ടീമായി ആർസിബി മാറി. പുരുഷ, വനിതാ ടീമുകൾ ഉൾപ്പെടുന്നതാണ് ഈ വമ്പൻ ഇടപാട്.

രാജസ്ഥാൻ റോയൽസ് ഇന്നലെ കുറിച്ച റെക്കോർഡാണ് 24 മണിക്കൂറിനുള്ളിൽ ആർസിബി തകർത്തത്. അമേരിക്കൻ വ്യവസായി കൽ സോമാനിയുടെ നേതൃത്വത്തിലുള്ള കൺസോർഷ്യം 1.63 ബില്യൺ ഡോളറിന് (ഏകദേശം 15,300 കോടി രൂപ) രാജസ്ഥാൻ റോയൽസിനെ സ്വന്തമാക്കിയിരുന്നു. എന്നാൽ ആർസിബിക്കായുള്ള ലേലം വിളി ഈ തുകയെയും മറികടക്കുകയായിരുന്നു. യുണൈറ്റഡ് സ്പിരിറ്റ്‌സ് ലിമിറ്റഡിൻറെ കൈവശമുണ്ടായിരുന്ന ടീമിനായി രഞ്ജൻ പൈയുടെ നേതൃത്വത്തിലുള്ള സംഘം, പ്രേംജി ഇൻവെസ്റ്റ് തുടങ്ങിയ വമ്പൻമാരും രംഗത്തുണ്ടായിരുന്നു.

പുതിയ ഉടമസ്ഥർ ചുമതലയേറ്റതോടെ ആർസിബിയുടെ മാനേജ്‌മെന്റിലും മാറ്റങ്ങൾ വന്നു. ആദിത്യ ബിർള ഗ്രൂപ്പ് ഡയറക്ടറും മുൻ ക്രിക്കറ്റ് താരവുമായ ആര്യമൻ വിക്രം ബിർള ആർസിബിയുടെ പുതിയ ചെയർമാനായി ചുമതലയേറ്റു. ടൈംസ് ഓഫ് ഇന്ത്യ ഗ്രൂപ്പിൻറെ സത്യൻ ഗജ്‌വാനിയാണ് വൈസ് ചെയർമാൻ. ഇന്ത്യയിലെ ഏറ്റവും വലിയ ആരാധകക്കൂട്ടമുള്ള ടീമിനെ സ്വന്തമാക്കിയതിൽ ഏറെ സന്തോഷമുണ്ടെന്നും, ആർസിബിയുടെ പാരമ്പര്യം കൂടുതൽ കരുത്തോടെ മുന്നോട്ട് കൊണ്ടുപോകുമെന്നും ആദിത്യ ബിർള ഗ്രൂപ്പ് ചെയർമാൻ കുമാർ മംഗലം ബിർള വ്യക്തമാക്കി.

നിലവിലെ ഐപിഎൽ ചാമ്പ്യൻമാരായ ആർസിബി കിരീടം നിലനിർത്താനുള്ള തയ്യാറെടുപ്പുകൾക്കിടയിലാണ് ഈ ഉടമസ്ഥാവകാശ മാറ്റം നടക്കുന്നത്. 18 വർഷത്തെ കാത്തിരിപ്പിനൊടുവിൽ കഴിഞ്ഞ സീസണിലാണ് ബെംഗളൂരു തങ്ങളുടെ കന്നിക്കിരീടം നേടിയത്. മുൻ ക്രിക്കറ്റ് താരം കൂടിയായ ആര്യമൻ വിക്രം ബിർള ടീമിൻറെ അമരത്തെത്തുന്നത് ആരാധകർക്കിടയിൽ വലിയ ആവേശം സൃഷ്ടിച്ചിട്ടുണ്ട്. ഐപിഎൽ ലോകകായിക രംഗത്തെ തന്നെ വൻശക്തിയായി വളർന്നുവെന്നതിന്റെ തെളിവാണ് ഇത്തരം വമ്പൻ നിക്ഷേപങ്ങളെന്നും ബിർള കൂട്ടിച്ചേർത്തു.