ഫോറിൻ കോൺട്രിബ്യൂഷൻ ഭേദഗതി ബിൽ 2026: വിദേശ ഫണ്ടുകളുടെ സുതാര്യതയും ഉത്തരവാദിത്തവും ഉറപ്പാക്കാൻ കർശന വ്യവസ്ഥകളുമായി കേന്ദ്ര സർക്കാർ,വിദേശ ഫണ്ടിംഗിന്മേലുള്ള നിയന്ത്രണം കർശനമാക്കുന്നതിൽ ഭയപ്പെടുന്നതാര് ?

ദില്ലി : രാജ്യത്തെ എൻജിഒകൾക്കും സന്നദ്ധ സംഘടനകൾക്കും ലഭിക്കുന്ന വിദേശ ഫണ്ടിംഗിന്മേലുള്ള സുതാര്യതയും നിയന്ത്രണങ്ങളും കർശനമാക്കുന്നതിനുള്ള നിർണ്ണായക നിയമനിർമ്മാണവുമായി കേന്ദ്ര സർക്കാർ മുന്നോട്ട്. വിദേശ സംഭാവനകളുടെ മേൽനോട്ടം, മാനേജ്‌മെന്റ്, ആസ്തികളുടെ കൈമാറ്റം എന്നിവ കൂടുതൽ ഉത്തരവാദിത്തമുള്ളതാക്കുന്നതിനാണ് പുതിയ ഫോറിൻ കോൺട്രിബ്യൂഷൻ (റെഗുലേഷൻ) ഭേദഗതി ബിൽ ലക്ഷ്യമിടുന്നത്. ജീവകാരുണ്യം, വിദ്യാഭ്യാസം, ആരോഗ്യം തുടങ്ങിയ മേഖലകളിലെ നിയമപരമായ പ്രവർത്തനങ്ങൾക്ക് വിദേശ സഹായം സ്വീകരിക്കുന്നതിൽ തടസ്സമില്ലെങ്കിലും, ഫണ്ടിന്റെ ഉറവിടവും അതിന്റെ അന്തിമ ഉപയോഗവും വ്യക്തമാക്കുന്ന കൃത്യമായ ഒരു ശൃംഖല ഉറപ്പാക്കുകയാണ് പുതിയ ഭേദഗതിയുടെ പ്രധാന ലക്ഷ്യമെന്ന് അധികൃതർ വ്യക്തമാക്കി.

2019 നും 2022 നും ഇടയിൽ ആയിരക്കണക്കിന് സംഘടനകൾ വലിയ തോതിലുള്ള വിദേശ ഫണ്ട് സ്വീകരിച്ചിട്ടുള്ള സാഹചര്യത്തിൽ, രാജ്യത്തിന്റെ പരമാധികാരവും ദേശീയ സുരക്ഷയും മുൻനിർത്തിയാണ് ശക്തമായ മേൽനോട്ട സംവിധാനം കൊണ്ടുവരുന്നത്. നിയമവിരുദ്ധ പ്രവർത്തനങ്ങളിലേക്ക് പണം വഴിതിരിച്ചുവിടുന്നത് തടയാനും ധനകാര്യ ഇടപാടുകളിൽ പൂർണ്ണമായ സുതാര്യത ഉറപ്പാക്കാനും ലക്ഷ്യമിട്ടുള്ളതാണ് ഈ നിയമമെന്ന് വിലയിരുത്തപ്പെടുന്നു. ആശുപത്രികൾ, വിദ്യാഭ്യാസ സ്ഥാപനങ്ങൾ എന്നിവയ്ക്ക് ലഭിക്കുന്ന യഥാർത്ഥ സഹായങ്ങളെ തടസ്സപ്പെടുത്താതെ, സുതാര്യതയില്ലാത്ത ഇടപാടുകളെ നിയന്ത്രിക്കാനാണ് പുതിയ ചട്ടങ്ങൾ രൂപകൽപ്പന ചെയ്തിരിക്കുന്നത്. സംഘടനകളുടെ എഫ്‌സിആർഎ രജിസ്ട്രേഷൻ റദ്ദാക്കപ്പെടുകയോ കാലാവധി കഴിയുകയോ ചെയ്യുമ്പോൾ, ആ സംഘടനകളുടെ കൈവശമുള്ള വിദേശ ഫണ്ടും ആസ്തികളും കൈകാര്യം ചെയ്യുന്നതിനായി ഒരു പ്രത്യേക അതോറിറ്റിയെ നിയമിക്കാൻ ബിൽ വ്യവസ്ഥ ചെയ്യുന്നുണ്ട്. ഈ ആസ്തികൾ താൽക്കാലികമായി ഏറ്റെടുക്കാനും പിന്നീട് രജിസ്ട്രേഷൻ പുതുക്കുന്ന മുറയ്ക്ക് തിരികെ നൽകാനുമുള്ള വ്യവസ്ഥകളും ഇതിൽ ഉൾപ്പെടുത്തിയിരിക്കുന്നു. സംഘടനകളുടെ രജിസ്ട്രേഷൻ നിലനിൽക്കുന്നില്ലെങ്കിൽ ഇത്തരം ആസ്തികൾ പൊതുആവശ്യങ്ങൾക്കായി വിനിയോഗിക്കാനും നിയമത്തിൽ വ്യവസ്ഥയുണ്ട്. പണം നൽകിയ യഥാർത്ഥ ദാതാവിനെ കണ്ടെത്തുക, പ്രൊജക്റ്റ് തലത്തിലുള്ള കണക്കുകൾ സൂക്ഷിക്കുക എന്നിവ സംഘടനകൾക്ക് നിർബന്ധമാകും. അതേസമയം, എഫ്‌സിആർഎ ലംഘനങ്ങൾക്കുമുള്ള പരമാവധി തടവുശിക്ഷ അഞ്ചു വർഷത്തിൽ നിന്ന് ഒരു വർഷമായി കുറയ്ക്കാനും, കേന്ദ്ര സർക്കാരിന്റെ മുൻകൂർ അനുമതിയിലൂടെമാത്രം അന്വേഷണങ്ങൾ ആരംഭിക്കാനും ബില്ലിൽ വ്യവസ്ഥ ചെയ്തിട്ടുണ്ട്. റഗുലേറ്റർമാർക്കും സംഘടനകൾക്കും ഒരുപോലെ ബാധകമാകുന്ന കർശന ഉത്തരവാദിത്തത്തിലൂടെ രാജ്യത്തെ വിദേശ ധനസഹായ രംഗത്ത് സുതാര്യത ഉറപ്പാക്കാനാണ് സർക്കാർ ലക്ഷ്യമിടുന്നത്.