കെഎസ്ആർടിസിയിലെ സ്ത്രീകളുടെ സൗജന്യ സ്ത്രീയാത്ര ജൂൺ 15 മുതൽ; ‘പ്രിയദർശിനി’ പദ്ധതിക്ക് മന്ത്രിസഭയുടെ അന്തിമ അംഗീകാരം

തിരുവനന്തപുരം : സംസ്ഥാനത്തെ കെഎസ്ആർടിസി ഓർഡിനറി ബസുകളിൽ പ്രായഭേദമന്യേ എല്ലാ സ്ത്രീകൾക്കും ട്രാൻസ്‌ജെൻഡർ വ്യക്തികൾക്കും പ്രഖ്യാപിച്ച സൗജന്യ യാത്രാ പദ്ധതിയായ ‘പ്രിയദർശിനി’ ജൂൺ 15 മുതൽ ആരംഭിക്കും. ഇന്ന് ചേർന്ന മന്ത്രിസഭായോഗത്തിലാണ് ഇതുസംബന്ധിച്ച അന്തിമ തീരുമാനമുണ്ടായതെന്ന് മുഖ്യമന്ത്രി വി.ഡി. സതീശൻ വാർത്താസമ്മേളനത്തിൽ അറിയിച്ചു. യുഡിഎഫ് മുന്നോട്ടുവെച്ച തിരഞ്ഞെടുപ്പ് പ്രകടനപത്രികയിലെ പ്രധാന വാഗ്ദാനങ്ങളിലൊന്നായ ‘ഇന്ദിരാ ഗാരണ്ടി’ പദ്ധതിയുടെ ഭാഗമായാണ് ഈ ചരിത്ര തീരുമാനം നടപ്പിലാക്കുന്നത്.

ആദ്യ 100 ദിവസം പരീക്ഷണാടിസ്ഥാനത്തിൽ ഓർഡിനറി ബസുകളിലായിരിക്കും പദ്ധതി നടപ്പിലാക്കുക. ഇതിന്റെ പ്രവർത്തനം സമഗ്രമായി വിലയിരുത്തിയ ശേഷമായിരിക്കും മറ്റ് ദീർഘദൂര സർവീസുകളിലേക്ക് പദ്ധതി വ്യാപിപ്പിക്കുന്ന കാര്യം പരിഗണിക്കുക. പ്രായമോ വരുമാന പരിധിയോ മറ്റ് നിബന്ധനകളോ ഇല്ലാതെയാണ് നിലവിൽ പദ്ധതിക്ക് അംഗീകാരം നൽകിയിട്ടുള്ളത്. പദ്ധതി നടപ്പിലാകുന്നതോടെ പ്രതിമാസം 65 മുതൽ 70 കോടി രൂപയുടെ വരെ അധിക ബാധ്യത സർക്കാരിനുണ്ടാകുമെന്നും കെഎസ്ആർടിസിയുടെ വാർഷിക വരുമാനത്തിൽ 800 കോടി രൂപയോളം കുറവ് വരുമെന്നും മുഖ്യമന്ത്രി വ്യക്തമാക്കി.

എന്നിരുന്നാലും ഈ അധിക ബാധ്യത പൂർണ്ണമായും സംസ്ഥാന സർക്കാർ തന്നെ കെഎസ്ആർടിസിക്ക് കൈമാറും. നിലവിൽ ജീവനക്കാരുടെ ശമ്പളവും പെൻഷനും ഉൾപ്പെടെയുള്ള ആവശ്യങ്ങൾക്കായി പ്രതിമാസം 125 കോടി രൂപ വീതം സർക്കാർ നൽകുന്നുണ്ട്. ഇതിന് പുറമെയായിരിക്കും പ്രിയദർശിനി പദ്ധതിക്കായി പ്രതിവർഷം 750 മുതൽ 800 കോടി രൂപ വരെ അധികമായി അനുവദിക്കുക. അതോടൊപ്പം തന്നെ, വരുന്ന ആറുമാസത്തിനുള്ളിൽ വരുമാനം വർദ്ധിപ്പിക്കുന്നതിനുള്ള വിവിധ മാർഗ്ഗങ്ങൾ ആരായണമെന്ന് കെഎസ്ആർടിസി അധികൃതരോട് സർക്കാർ അഭ്യർത്ഥിച്ചിട്ടുണ്ട്. കെഎസ്ആർടിസിയുടെ ആഭ്യന്തര വരുമാനം കൂടി വർദ്ധിപ്പിച്ച് പദ്ധതിയുടെ അടുത്ത ഘട്ടത്തിലേക്ക് കടക്കാൻ സാധിക്കുമെന്നാണ് സർക്കാർ പ്രതീക്ഷിക്കുന്നത്.

സൗജന്യയാത്ര അനുവദിക്കുന്നതിന്റെ പൂർണ്ണ സാമ്പത്തിക ഉത്തരവാദിത്തം സർക്കാർ ഏറ്റെടുക്കുമെന്നും കെഎസ്ആർടിസി ജീവനക്കാർക്ക് ഇതിൽ യാതൊരുവിധ ആശങ്കയും വേണ്ടെന്നും ഗതാഗതമന്ത്രി സി.പി. ജോൺ വ്യക്തമാക്കി. പദ്ധതിയുടെ സുഗമമായ നടത്തിപ്പിനായി ഓരോ ദിവസത്തെയും സ്ത്രീ യാത്രാക്കാരുടെ കൃത്യമായ വിവരങ്ങൾ കെഎസ്ആർടിസി ശേഖരിക്കും. ഇതിലൂടെ ഓരോ മാസവുമുണ്ടാകുന്ന യാത്രാച്ചെലവിന്റെ യഥാർത്ഥ ബാധ്യത കണക്കാക്കി കെഎസ്ആർടിസി സർക്കാരിനെ അറിയിക്കുമെന്നും ഗതാഗതവകുപ്പ് വ്യക്തമാക്കി.

എന്നാൽ, കൃത്യമായ വരുമാന മാർഗ്ഗങ്ങളോ ആസൂത്രണമോ ഇല്ലാതെ വോട്ട് ബാങ്ക് ലക്ഷ്യം വെച്ച് കോൺഗ്രസ് നടത്തുന്ന ഇത്തരം സൗജന്യ പ്രഖ്യാപനങ്ങൾ പൊതുഗതാഗത സംവിധാനത്തിന്റെ തകർച്ചയ്ക്ക് ആക്കം കൂട്ടുമെന്ന വിമർശനം ഇതിനകം ഉയർന്നു കഴിഞ്ഞു.

ആദ്യ 100 ദിവസം പരീക്ഷണാടിസ്ഥാനത്തിൽ ഓർഡിനറി ബസുകളിൽ മാത്രമായിരിക്കും പദ്ധതിയെന്നും പിന്നീട് മറ്റ് സർവീസുകളിലേക്ക് വ്യാപിപ്പിക്കുമെന്നുമാണ് മുഖ്യമന്ത്രി അറിയിച്ചിട്ടുള്ളത്. എന്നാൽ നിലവിൽ തന്നെ കടുത്ത കടക്കെണിയിലായ കെഎസ്ആർടിസിക്ക് ഈ ഒരൊറ്റ പദ്ധതി വഴി മാത്രം പ്രതിമാസം 65 മുതൽ 70 കോടി രൂപയുടെ വരെ വരുമാന നഷ്ടമുണ്ടാകും. വർഷത്തിൽ 800 കോടിയിലധികം രൂപയുടെ ഈ വൻ ബാധ്യത സർക്കാർ നികത്തുമെന്ന് പറയുന്നുണ്ടെങ്കിലും, സംസ്ഥാനത്തിന്റെ പൊതുവായ സാമ്പത്തിക സ്ഥിതി പരിഗണിക്കുമ്പോൾ ഇത് എത്രത്തോളം പ്രായോഗികമാണെന്ന ചോദ്യം ബാക്കിയാവുകയാണ്. നിലവിൽ ശമ്പളത്തിനും പെൻഷനുമായി നൽകുന്ന 1500 കോടിക്ക് പുറമെയാണ് ഈ തുകയെന്നത് ഖജനാവിന് മേലുള്ള ഭാരം ഇരട്ടിയാക്കും.

വരുമാനം വർദ്ധിപ്പിക്കാൻ കെഎസ്ആർടിസി തന്നെ പുതിയ മാർഗ്ഗങ്ങൾ തേടണമെന്ന വിചിത്രമായ അഭ്യർത്ഥനയും സർക്കാർ മുന്നോട്ട് വെച്ചിട്ടുണ്ട്. കൃത്യമായ വികസന കാഴ്ചപ്പാടുകളോ ദീർഘവീക്ഷണമോ ഇല്ലാതെ, വെറും രാഷ്ട്രീയ നേട്ടത്തിനായി കോൺഗ്രസ് സർക്കാർ കൊണ്ടുവരുന്ന ഇത്തരം ‘സൗജന്യ’ രാഷ്ട്രീയ നയങ്ങൾ ആത്യന്തികമായി പൊതുമേഖലാ സ്ഥാപനങ്ങളെ പൂർണ്ണ തകർച്ചയിലേക്ക് എത്തിക്കുമെന്നാണ് സാമ്പത്തിക വിദഗ്ധർ ചൂണ്ടിക്കാണിക്കുന്നത്. ജീവനക്കാരുടെ ആനുകൂല്യങ്ങളും കൃത്യമായ ശമ്പള വിതരണവും പോലും പ്രതിസന്ധിയിലാകാൻ സാധ്യതയുള്ള സാഹചര്യത്തിൽ, ഗതാഗത മന്ത്രി സി.പി. ജോണിന്റെ ആശ്വാസ വാക്കുകൾ വെറും രാഷ്ട്രീയ നാടകം മാത്രമാണെന്ന ആക്ഷേപവും ശക്തമാണ്.