കേറി വാടാ പിള്ളാരേ … ട്രമ്പിനോട് പോവാൻ പറ !!ഇന്ത്യക്കാരെ സ്വാഗതം ചെയ്ത് ജര്‍മ്മനി; 90,000 പ്രൊഫഷണൽ വിസകൾ ഇന്ത്യക്കാർക്കായി നീക്കി വച്ചു

ദില്ലി : എച്ച്-1ബി വിസ നയങ്ങൾ അമേരിക്ക കർശനമാക്കിയതോടെ, യൂറോപ്പിലെ ഏറ്റവും വലിയ സാമ്പത്തിക ശക്തിയായ ജർമ്മനി ഇന്ത്യൻ പ്രൊഫഷണലുകളെ ആകർഷിക്കുന്നതിനുള്ള ശ്രമങ്ങൾ ഊർജ്ജിതമാക്കി. എച്ച്-1ബി വിസാ അപേക്ഷാ ഫീസ് കുത്തനെ ഉയർത്തിയ അമേരിക്കൻ ഭരണകൂടത്തിന്റെ നീക്കത്തിന് പിന്നാലെയാണ്, സ്ഥിരതയുള്ള കുടിയേറ്റ നയങ്ങളുമായി ജർമ്മനി രംഗത്തെത്തിയിരിക്കുന്നത്.
ഇന്ത്യയിലെ ജർമ്മൻ അംബാസഡർ ഡോ. ഫിലിപ്പ് അക്കർമാൻ കഴിഞ്ഞ ദിവസം X-ൽ പങ്കുവെച്ച വീഡിയോ സന്ദേശത്തിലൂടെയാണ് ഇന്ത്യൻ വിദഗ്ധ തൊഴിലാളികളെ ജർമ്മനിയിലേക്ക് സ്വാഗതം ചെയ്തത്. “ഉയർന്ന വൈദഗ്ധ്യമുള്ള എല്ലാ ഇന്ത്യക്കാർക്കും ഇതാ എൻ്റെ ക്ഷണം. സുസ്ഥിരമായ കുടിയേറ്റ നയങ്ങളും ഐടി, മാനേജ്മെന്റ്, ശാസ്ത്രം, സാങ്കേതികവിദ്യ എന്നീ മേഖലകളിലെ മികച്ച തൊഴിലവസരങ്ങളും ജർമ്മനിയെ വേറിട്ടുനിർത്തുന്നു,” അദ്ദേഹം X-ൽ കുറിച്ചു.

ജർമ്മനിയിൽ ജോലി ചെയ്യുന്ന ശരാശരി ഇന്ത്യൻ തൊഴിലാളിക്ക് ശരാശരി ജർമ്മൻ പൗരനെക്കാൾ കൂടുതൽ വരുമാനം ലഭിക്കുന്നുണ്ടെന്ന് അംബാസഡർ വീഡിയോയിൽ ചൂണ്ടിക്കാട്ടി. “ഉയർന്ന ശമ്പളം എന്നത് ഇന്ത്യൻ തൊഴിലാളികൾ ജർമ്മൻ സമൂഹത്തിനും ക്ഷേമത്തിനും വലിയ സംഭാവനകൾ നൽകുന്നുവെന്നാണ് അർത്ഥമാക്കുന്നത്. കഠിനാധ്വാനത്തിലും മികച്ച ജോലികൾക്ക് ഏറ്റവും മികച്ച ആളുകളെ തിരഞ്ഞെടുക്കുന്നതിലും ഞങ്ങൾ വിശ്വസിക്കുന്നു,” അദ്ദേഹം കൂട്ടിച്ചേർത്തു.

അമേരിക്കൻ പ്രസിഡന്റ് ട്രമ്പ് എച്ച്-1ബി വിസാ ഫീസ് $215-നും $5,000-നും ഇടയിലുള്ള നിലവിൽ നിന്ന് $100,000 ആയി ഉയർത്തിയതിന് പിന്നാലെയാണ് ജർമ്മനിയുടെ ഈ നീക്കം. പെട്ടെന്നുണ്ടായ ഈ നയവ്യതിയാനം ഇന്ത്യൻ ടെക്കികൾക്കും ഔട്ട്സോഴ്സിങ് സ്ഥാപനങ്ങൾക്കും കനത്ത പ്രഹരമായി. അതേസമയം, കുടിയേറ്റ നയങ്ങൾ പെട്ടെന്ന് മാറ്റുന്ന സമീപനം ജർമ്മനിക്കില്ലെന്ന് അംബാസഡർ അക്കർമാൻ വ്യക്തമാക്കി.

ജർമ്മൻ കുടിയേറ്റ നയത്തെ അദ്ദേഹം ഒരു ജർമ്മൻ കാറിനോട് ഉപമിച്ചു: “ഇതൊരു ജർമ്മൻ കാർ പോലെ വിശ്വസനീയവും, ആധുനികവും, പ്രവചനാതീതവുമല്ല. ഇത് നേർരേഖയിൽ സഞ്ചരിക്കുന്നു. പെട്ടെന്നുള്ള മാറ്റങ്ങൾ ഭയപ്പെടേണ്ടതില്ല. ഞങ്ങളുടെ നിയമങ്ങൾ ഒറ്റരാത്രികൊണ്ട് ഞങ്ങൾ മാറ്റാറില്ല.”
2040 വരെ പ്രതിവർഷം 288,000 കുടിയേറ്റ തൊഴിലാളികളെ ആവശ്യമുണ്ടെന്നാണ് ജർമ്മൻ വിദഗ്ധരുടെ കണക്ക്. ഈ ആവശ്യം നിറവേറ്റാൻ തൊഴിൽ വിസകളുടെ എണ്ണം 10 ശതമാനത്തിലധികം വർദ്ധിപ്പിക്കാനും ഇന്ത്യൻ തൊഴിലാളികൾക്കായുള്ള വിസ ക്വാട്ട ഗണ്യമായി ഉയർത്താനും ജർമ്മൻ സർക്കാർ പദ്ധതിയിട്ടിട്ടുണ്ട്.

കഴിഞ്ഞ വർഷം, 2025-ൽ 200,000 പ്രൊഫഷണൽ വിസകൾ അനുവദിക്കുമെന്ന് ജർമ്മൻ സർക്കാർ പ്രഖ്യാപിച്ചിരുന്നു. ഇതിൽ 90,000 വിസകൾ ഇന്ത്യക്കാർക്കായി നീക്കിവച്ചിട്ടുണ്ട്. നിലവിൽ 130,000 ഇന്ത്യൻ പ്രൊഫഷണലുകൾ ജർമ്മനിയിൽ ജോലി ചെയ്യുന്നുണ്ട്. 2023-ലെ കണക്കനുസരിച്ച്, ജർമ്മൻ ജീവനക്കാരുടെ ശരാശരി പ്രതിമാസ ശമ്പളം 3,945 യൂറോ ആയിരുന്നപ്പോൾ, ഇന്ത്യൻ വംശജരായ പ്രൊഫഷണലുകളുടെ ശരാശരി വരുമാനം 5,359 യൂറോ ആയിരുന്നു.