പരിസ്ഥിതി സംരക്ഷണത്തിനും സുസ്ഥിര വികസനത്തിനുമായി നൽകിയ ആഗോള സംഭാവനകൾക്ക് വീണ്ടും ആഗോള അംഗീകാരം ! സെയ്ഷെൽസിന്റെ പരമോന്നത ബഹുമതി ‘ഗാർഡിയൻ ഓഫ് ദ ബ്ലൂ ഹൊറൈസൺ’ പ്രധാനമന്ത്രി നരേന്ദ്രമോദിയ്ക്ക്

ദില്ലി :പരിസ്ഥിതി സംരക്ഷണത്തിനും സുസ്ഥിര വികസനത്തിനുമായി നൽകിയ ആഗോള സംഭാവനകൾ മുൻനിർത്തി പ്രധാനമന്ത്രി നരേന്ദ്രമോദിക്ക് സീഷെൽസിന്റെ പരമോന്നത ബഹുമതി. ‘ഗാർഡിയൻ ഓഫ് ദി ബ്ലൂ ഹൊറൈസൺ’ പുരസ്കാരമാണ് പ്രധാനമന്ത്രിക്ക് സമ്മാനിച്ചത്. കാലാവസ്ഥ വ്യതിയാനത്തിനെതിരെയുള്ള പോരാട്ടം, ഹരിത വികസനം, സമുദ്രവിഭവങ്ങളുടെ ഉത്തരവാദിത്തമുള്ള വിനിയോഗം എന്നിവ പ്രോത്സാഹിപ്പിക്കുന്നതിൽ പ്രധാനമന്ത്രി നരേന്ദ്രമോദി നൽകിയ നേതൃത്വത്തിനുള്ള ആദരവായാണ് ഈ പുരസ്കാരം. സുസ്ഥിരമായ സാമ്പത്തിക വളർച്ചയ്ക്കും ബ്ലൂ ഇക്കോണമിക്കും അദ്ദേഹം നൽകുന്ന ദീർഘകാല പിന്തുണയെ സീഷെൽസ് പ്രസിഡൻഷ്യൽ പ്രസ്താവനയിൽ പ്രത്യേകം അഭിനന്ദിച്ചു. ചെറിയ ദ്വീപ് രാഷ്ട്രങ്ങളുടെ വികസനത്തിനും കാലാവസ്ഥാ പ്രതിരോധത്തിനും ഇന്ത്യ നൽകുന്ന പിന്തുണയും ഇരുരാജ്യങ്ങളും തമ്മിലുള്ള ആഴമേറിയ നയതന്ത്രബന്ധവും പുരസ്കാര പ്രഖ്യാപനത്തിൽ അടിവരയിട്ടു.

സീഷെൽസിന്റെ പരമോന്നത ബഹുമതി ലഭിച്ചതിൽ അങ്ങേയറ്റം വിനയാന്വിതനാണെന്ന് പ്രധാനമന്ത്രി നരേന്ദ്ര മോദി പ്രതികരിച്ചു. സാമൂഹിക മാധ്യമമായ എക്സിലൂടെയാണ് അദ്ദേഹം തന്റെ സന്തോഷം പങ്കുവെച്ചത്. ബഹുമതി പൂർണ്ണമായ ആദരവോടെ സ്വീകരിക്കുന്നുവെന്നും, കാലാവസ്ഥാ വ്യതിയാനത്തിന്റെ വെല്ലുവിളികളോട് പോരാടുന്ന ലോകത്തെ എല്ലാ രാജ്യങ്ങൾക്കുമായി ഈ പുരസ്കാരം സമർപ്പിക്കുന്നുവെന്നും അദ്ദേഹം കുറിച്ചു. ഭാവി തലമുറയോടുള്ള ഉത്തരവാദിത്തമായി പരിസ്ഥിതി സംരക്ഷണത്തെ കാണുന്ന എല്ലാ രാഷ്ട്രങ്ങൾക്കുമുള്ള അംഗീകാരമാണിതെന്നും പ്രധാനമന്ത്രി കൂട്ടിച്ചേർത്തു.

ആഗോള പരിസ്ഥിതി സംരക്ഷണത്തിനും സുസ്ഥിര വികസനത്തിനും പ്രധാനമന്ത്രി മോദി നൽകിയ സംഭാവനകൾക്ക് അന്താരാഷ്ട്ര തലത്തിൽ ലഭിക്കുന്ന ഏറ്റവും പുതിയ അംഗീകാരമാണിത്. ഭക്ഷ്യസുരക്ഷ ഉറപ്പാക്കുന്നതിനും സുസ്ഥിര കൃഷിരീതികൾ പ്രോത്സാഹിപ്പിക്കുന്നതിനുമുള്ള പ്രവർത്തനങ്ങൾക്ക് തൊട്ടുമുൻപത്തെ മാസമായ 2026 മേയിൽ ഐക്യരാഷ്ട്രസഭയുടെ ഫുഡ് ആൻഡ് അഗ്രികൾച്ചർ ഓർഗനൈസേഷൻ (FAO) അദ്ദേഹത്തിന് പ്രശസ്തമായ അഗ്രിക്കോള മെഡൽ സമ്മാനിച്ചിരുന്നു. ഇതിന് പുറമെ സുസ്ഥിര സാമ്പത്തിക വളർച്ചയ്ക്കും ആഗോള സഹകരണത്തിനുമായി 2018-ൽ അദ്ദേഹത്തിന് സോൾ സമാധാന പുരസ്കാരവും ലഭിക്കുകയുണ്ടായി. ഇതേ വർഷം തന്നെ ഐക്യരാഷ്ട്രസഭയുടെ ഏറ്റവും ഉയർന്ന പരിസ്ഥിതി ബഹുമതിയായ ‘ചാമ്പ്യൻസ് ഓഫ് ദി എർത്ത്’ പുരസ്കാരവും പ്രധാനമന്ത്രി നരേന്ദ്ര മോദിയെ തേടിയെത്തിയിരുന്നു. സീഷെൽസിന്റെ പുതിയ പുരസ്കാരം കൂടിയെത്തുന്നതോടെ ആഗോള പരിസ്ഥിതി നയ രൂപീകരണത്തിൽ നരേന്ദ്ര മോദിയുടെയും ഇന്ത്യയുടെയും നേതൃപാടവത്തിനുള്ള ലോകത്തിന്റെ അംഗീകാരമാണ് ഒരിക്കൽക്കൂടി വ്യക്തമാകുന്നത്.