സൗദി അറേബ്യയിലെ റാസ് തനുരയിൽ ഹെലികോപ്റ്റർ തകർന്ന് വീണു! 14 പേർക്ക് ദാരുണാന്ത്യം; അപകട കാരണത്തിൽ അവ്യക്തത

സൗദി അറേബ്യയിലെ പ്രമുഖ എണ്ണക്കമ്പനിയായ അരാംകോയുടെ ഹെലികോപ്റ്റർ റാസ് തനൂറയ്ക്ക് സമീപം ഞായറാഴ്ച തകർന്നുവീണ് 14 പേർ മരിച്ചതായി ഔദ്യോഗിക വാർത്താ ഏജൻസി റിപ്പോർട്ട് ചെയ്തു. സൗദി അറേബ്യയുടെ കിഴക്കൻ തീരത്താണ് വിമാനം തകർന്നുവീണത്. അപകടത്തിന്റെ കാരണം വ്യക്തമല്ല. സംഭവത്തിൽ അടിയന്തര അന്വേഷണത്തിന് ഉത്തരവിട്ടിട്ടുണ്ട്.

നാല് മാസത്തെ ഇടവേളയ്ക്ക് ശേഷം റാസ് തനൂറ ടെർമിനലിൽ നിന്നുള്ള ക്രൂഡ് ഓയിൽ കയറ്റുമതി അരാംകോ അടുത്തിടെയാണ് പുനരാരംഭിച്ചത്. ഇതിന് പിന്നാലെയാണ് ദാരുണമായ ഈ അപകടം സംഭവിച്ചിരിക്കുന്നത്. അമേരിക്കയും ഇറാനും തമ്മിലുള്ള ഇടക്കാല കരാറിന് മുന്നോടിയായി മിഡിൽ ഈസ്റ്റിലെ എണ്ണ ഉൽപ്പാദകർ ഉൽപ്പാദനം വർദ്ധിപ്പിക്കുന്ന പശ്ചാത്തലത്തിലാണ് അരാംകോയും കയറ്റുമതി പുനരാരംഭിച്ചത്.

പ്രാദേശിക സമയം പുലർച്ചെ 6 മണിയോടെയായിരുന്നു അപകടം. എന്നാൽ ഇതുമായി ബന്ധപ്പെട്ട മാധ്യമങ്ങളുടെ ചോദ്യങ്ങളോട് പ്രതികരിക്കാൻ അരാംകോ ഇതുവരെ തയ്യാറായിട്ടില്ല. ലോകത്തിലെ ഏറ്റവും വലിയ എണ്ണ കയറ്റുമതിക്കാരായ സൗദി അറേബ്യ, സങ്കീർണ്ണമായ ഭൗമരാഷ്ട്രീയ സാഹചര്യങ്ങൾക്കിടയിലും തങ്ങളുടെ തന്ത്രപ്രധാനമായ ഊർജ്ജ പദ്ധതികളുമായി മുന്നോട്ട് പോകുന്നതിനിടയിലാണ് ഈ ദുരന്തം സംഭവിച്ചിരിക്കുന്നത്.