നടുവേദനയുമായി ക്ലിനിക്കില്‍ എത്തിയ യുവതിയുടെ വസ്ത്രം അഴിച്ച്‌ സ്വകാര്യഭാഗത്ത് സ്പര്‍ശിക്കാന്‍ ശ്രമം; പ്രമുഖ ഡോക്ടര്‍ക്കെതിരെ പരാതി

പനാജി: നടുവേദനയുമായി എത്തിയ യുവതിക്ക് നേരെ ഡോക്ടര്‍ ലൈംഗികാതിക്രമം നടത്തിയതായി പരാതി. ഗോവയിലെ മപുസയിലെ ഒരു സ്വകാര്യ ക്ളിനിക്കിൽ കഴിഞ്ഞ ദിവസമായിരുന്നു സംഭവം. വനിതാ നഴ്‌സിന്റെ അഭാവത്തില്‍ ക്ലിനിക്കിന് അകത്തേയ്ക്ക് കൂട്ടിക്കൊണ്ടുപോയി യുവതിയെ അപമാനിച്ചു എന്നാണ് പരാതിയില്‍ പറയുന്നത്.

ഭർത്താവിനൊപ്പമാണ് യുവതി ഡോക്ടറെ കാണാനെത്തിയത്. നടുവേദനയുടെ കാര്യം വിശദമായി ചോദിച്ചറിഞ്ഞശേഷം ഭർത്താവിനോട് മുറിക്ക് പുറത്തേക്ക് പോകാൻ ആവശ്യപ്പെട്ടു. പരിശോധനയുടെ ഭാഗമായി യുവതിയോട് കിടക്കാന്‍ ആവശ്യപ്പെട്ടു. സ്വകാര്യ ഭാഗത്ത് സ്പർശിക്കാൻ ശ്രമിച്ചതോടെ ഡോക്ടറുടെ കൈ തട്ടിമാറ്റി യുവതി പുറത്തേക്കോടി ഭർത്താവിനോട് കാര്യം പറയുകയായിരുന്നു. സംഭവത്തിന് പിന്നാലെ ഡോക്ടര്‍ സ്ഥലത്ത് നിന്ന് കാറില്‍ കടന്നുകളഞ്ഞതായാണ് റിപ്പോര്‍ട്ട്.

യുവതിയുടെ ഭര്‍ത്താവ് ഡോക്ടറുടെ മുഖത്തടിച്ചതായും റിപ്പോര്‍ട്ടില്‍ പറയുന്നു. ഡോക്ടര്‍ക്കെതിരെ യുവതി പൊലീസില്‍ പരാതി നല്‍കി. ഡോക്ടർ മുൻകൂർ ജാമ്യത്തിന് കോടതിയെ സമീപിച്ചിട്ടുണ്ട്. സംസ്ഥാനത്തെ അറിയപ്പെടുന്ന ഒരു ഡോക്ടർക്കെതിരെയാണ് പരാതി ലഭിച്ചതെന്ന് പൊലീസ് വ്യക്തമാക്കിയെങ്കിലും ഇയാളെക്കുറിച്ചുള്ള കൂടുതൽ വിവരങ്ങൾ പുറത്തുവിട്ടിട്ടില്ല. പൊലീസ് ഡോക്ടര്‍ക്കെതിരെ കേസെടുത്ത് അന്വേഷണം ആരംഭിച്ചിട്ടുണ്ട്.