കരിപ്പൂരിൽ വീണ്ടും സ്വർണ്ണക്കടത്ത്; ഇത്തവണ കടത്തിയത് മലദ്വാരത്തിൽ ഒളിപ്പിച്ച്, രണ്ടു പേർ പിടിയിൽ

കോഴിക്കോട്: കരിപ്പൂർ വിമാനത്താവളത്തിൽ വീണ്ടും സ്വർണ്ണം കടത്തിയത് പിടികൂടി. മലദ്വാരത്തിൽ ഒളിപ്പിച്ച് കടത്തിയ സ്വർണ്ണമാണ് കണ്ടെത്തിയത്. മലദ്വാരത്തിൽ മൂന്നു കാപ്സ്യൂളുകളിലാക്കി ഒളിപ്പിച്ച് സ്വർണം കടത്താൻ ശ്രമിച്ച രണ്ട് പേരാണ് പിടിയിലായത്. കോഴിക്കോട് പയ്യോളി സ്വദേശി നൗഷ് കെ.പി. കാസർഗോഡ് കാഞ്ഞങ്ങാട് സ്വദേശി റൗഫ്, എന്നിവരാണ് പോലീസിന്റെ പിടിയിലായത്.

ബുധനാഴ്ച പുലർച്ചെ ബഹറിനിൽ നിന്ന് വന്ന ജി.എഫ്. 260ലെ യാത്രക്കാരനായിരുന്നു റൗഫ്. കസ്റ്റംസ് പരിശോധന കഴിഞ്ഞ് പുറത്തിറങ്ങിയ ഇയാളെ പോലീസ് എയ്ഡ് പോസ്റ്റിലേക്ക് കൊണ്ട് വന്ന് ചോദ്യം ചെയ്യുകയായിരുന്നു. തുടർന്ന് എക്സറേ പരിശോധനയിൽ ശരീരത്തിനുള്ളിൽ ഒളിപ്പിച്ച ക്യാപ്സ്യൂളുകൾ കണ്ടു. ഇതോടെ പിടി വീഴുകയായിരുന്നു.

മൂന്നു ക്യാപ്സ്യൂളുകളിലായി 766 ഗ്രാം സ്വർണമാണ് റൗഫ് കടത്താൻ ശ്രമിച്ചത്. വിമാനത്താവളത്തിന് പുറത്തെത്തിച്ചാൽ സ്വർണക്കടത്ത് സംഘം ഇയാളെ ഫോണിൽ വിളിക്കുമെന്നായിരുന്നു നിർദേശം. വിളിക്കുന്ന ആളിന് സ്വർണം നൽകാനായിരുന്നു ഇയാൾക്ക് ലഭിച്ച നിർദ്ദേശമെന്നും പോലീസ് പറഞ്ഞു.