തിരുവനന്തപുരം: ചട്ടമ്പിസ്വാമി സാംസ്കാരിക സമിതി ഒരു വര്ഷക്കാലമായി ആചരിച്ച് വരുന്ന സ്മൃതിപൂജാ വര്ഷത്തിന്റെ സമാപനത്തോടനുബന്ധിച്ച് ഏര്പ്പെടുത്തിയ പുരസ്കാരം ഗോവ ഗവർണർ ശ്രീ. പി എസ് ശ്രീധരൻ പിള്ളയ്ക്ക് ലഭിച്ചു. സാഹിത്യ സാംസ്കാരിക മേഖലകൾക്ക് നൽകിയ സംഭാവനകളെ പരിഗണിച്ചാണ് മുൻ ചീഫ് സെക്രട്ടറി ശ്രീ. ആർ രാമചന്ദ്രൻ, പ്രമുഖ എഴുത്തുകാരൻ ഡോ ജോർജ് ഓണക്കൂർ ,ശ്രീ. എസ് മഹാദേവൻ തമ്പി എന്നിവരടങ്ങുന്ന ജൂറി പുരസ്കാര ജേതാവിനെ കണ്ടെത്തിയത്.
മലയാളത്തിലും ഇംഗ്ലീഷിലുമായി 237 ഗ്രന്ഥങ്ങളുടെ കർത്താവായ ശ്രീധരൻ പിള്ളയുടെ പുസ്തകങ്ങൾ ഹിന്ദി, കന്നഡ, കൊങ്കിണി,തെലുങ്ക്, ഒറിയ, ആസാമി, ബംഗാളി ഭാഷകളിലും മൊഴിമാറ്റം ചെയ്യപ്പെട്ടിട്ടുണ്ട്. ജൂലൈ 22 ന് രാവിലെ 11 മണിക്ക് തിരുവനന്തപുരത്തെ സൗത്ത് പാർക്ക് ഓഡിറ്റോറിയത്തിൽ നടക്കുന്ന ചടങ്ങിൽ മുൻ ഉപരാഷ്ട്രപതി ശ്രീ. എം വെങ്കയ്യ നായിഡു പുരസ്കാര സമർപ്പണം നടത്തും. മഹാറാണി അശ്വതി തിരുനാൾ ഗൗരി ലക്ഷ്മീഭായി, ശ്രീ. രമേശ് ചെന്നിത്തല, കുമ്മനം രാജശേഖരൻ, ശ്രീ.പന്ന്യൻ രവീന്ദ്രൻ, മലങ്കര ആർച്ച് ബിഷപ്പ് കർദ്ദിനാൾ ക്ലീമിസ് മാർ ബസേലിയസ് തുടങ്ങി വിവിധ മേഖലകളിലെ പ്രമുഖർ പങ്കെടുക്കും.
