ഗാന്ധിനഗർ: നിയമസഭാ തിരഞ്ഞെടുപ്പ് അടുത്തിരിക്കെ ഗുജറാത്ത് കോൺഗ്രസിൽ കൊഴിഞ്ഞു പോക്ക് രൂക്ഷമാകുന്നു. ഗുജറാത്തിലെ പ്രമുഖ ആദിവാസി നേതാവും കോണ്ഗ്രസ് എംഎല്എയുമായ അശ്വിന് കോട്ട്വാള് ബിജെപിയില് ചേര്ന്നു.
കേദ്ബ്രഹ്മ വനവാസി മേഖലയിലെ എംഎൽഎയായ കോട്ട്വാൾ ഇന്ന് രാവിലെയാണ് സ്പീക്കർക്ക് രാജിക്കത്ത് സമർപ്പിച്ചത്. പിന്നാലെ ബിജെപിയിൽ ചേരുകയായിരുന്നു. ഖേത്ബ്രഹ്മ മണ്ഡലത്തില് നിന്നുള്ള അംഗവും കോണ്ഗ്രസിന്റെ സഭയിലെ വിപ്പുമായിരുന്നു.
2007 മുതൽ ഗുജറാത്തിൽ എംഎൽഎ ആയി സേവനമനുഷ്ഠിക്കുകയാണ് അശ്വിന് കോട്ട്വാള്. മാത്രമല്ല മൂന്ന് തവണയായി ഖേത്ബ്രഹ്മ മണ്ഡത്തില് നിന്നുള്ള നിയമസഭാംഗമാണ് അശ്വിന്ഭായ് ലക്ഷമണ്ഭായ് കോട്ട്വാള് എന്ന അശ്വിന് കോട്ട്വാള്.
അതേസമയം 1990-ല് അല്ലാതെ ഒരിക്കല്പോലും കോണ്ഗ്രസ് മണ്ഡലത്തില് പരാജയം അറിഞ്ഞിട്ടില്ല. അതിനാല് തന്നെ ശക്തി ദുര്ഗത്തില് നിന്നുള്ള എംഎല്എ തന്നെ പാര്ട്ടിവിട്ട് ബിജെപിയില് ചേര്ന്നത് പാര്ട്ടിക്ക് വന് തിരിച്ചടിയായിരിക്കുകയാണ്.
അശ്വിന് രാജിവെച്ചതോടെ നിയമസഭയിൽ പ്രതിപക്ഷമായ കോൺഗ്രസിന്റെ അംഗബലം 63 ആയി കുറഞ്ഞു. ഭരണകക്ഷിയായ ബിജെപിക്ക് നിയമസഭയിൽ 111 എംഎൽഎമാരാണുള്ളത്. ഇത് കോൺഗ്രസിന്റെ നിലനിൽപ്പിനെ തന്നെ ബാധിക്കുമെന്നാണ് വിലയിരുത്തൽ.