യുക്രൈനിൽ വെടിയേറ്റത് പഞ്ചാബ് സ്വദേശിക്ക്; വെടിയേറ്റയാളുടെ ആരോഗ്യനില ഗുരുതരമല്ല

കീവ്: യുക്രൈനിലെ കീവിൽ വെടിയേറ്റത് പഞ്ചാബ് സ്വദേശിക്ക്. പഞ്ചാബ് സ്വദേശി ഹർജോത് സിം​ഗിനാണ് വെടിയേറ്റതെന്നാണ് റിപ്പോർട്ട്. നിലവിൽ വെടിയേറ്റയാൾ കീവിലെ സിറ്റി ക്ലിനിക്കൽ ആശുപത്രിയിൽ ചികിത്സയിൽ കഴിയുകയാണ്. ഇയാളുടെ പരുക്ക് ​ഗുരുതരമല്ല.

കീവിൽ നിന്നും രക്ഷപ്പെടാൻ ശ്രമിക്കുന്നതിനിടെ യുക്രെയ്നിൽ ഒരു ഇന്ത്യൻ വിദ്യാർത്ഥിക്ക് വെടിയേറ്റന്ന് കേന്ദ്ര ​ഗതാ​ഗത,സിവിൽ ഏവിയേഷൻ സഹമന്ത്രി ജനറൽ വികെ സിം​ഗ് നേരത്തെ വാർത്താ ഏജൻസിയായ എഎൻഐയിലൂടെ സ്ഥിരീകരിച്ചിരുന്നു.

അതേസമയം ഇന്ത്യയിലേക്ക് എത്തുന്നതിനായി യുക്രെയിനിലെ കീവിൽ നിന്നും അതിർത്തിയിലേക്ക് നീങ്ങിയ വിദ്യാർത്ഥിക്ക് വെടിയേറ്റതായി തനിക്ക് വിവരം ലഭിച്ചുവെന്ന് അദ്ദേഹം വ്യക്തമാക്കിയിരുന്നു. മാത്രമല്ല യുക്രെയ്നിൽ നിന്ന് പരമാവധി ഒഴിപ്പിക്കലിന് സർക്കാർ ശ്രമിക്കുന്നുണ്ടെന്നും വികെ സിം​ഗ് പോളണ്ടിൽ നിന്ന് എഎൻഐയോട് പറഞ്ഞു.