കൂടം കൊണ്ട് ശത്രുക്കളെ വീഴ്ത്തും ! മദ്യത്തിനും മയക്കുമരുന്നിനും അടിമപ്പെടാത്ത അതുൽ ലഹരിയാക്കിയത് ചോരയുടെ ഗന്ധത്തെ; ഗുണ്ടാപ്പകയുടെ ഒടുവിലത്തെ ഇരയായി അലുവ അതുൽ ഒടുങ്ങുമ്പോൾ

കൊല്ലം : ഗുണ്ടാപ്പകയുടെ ഒടുവിലത്തെ ഇരയായി കൊല്ലം കരുനാഗപ്പള്ളിയിൽ കൊല്ലപ്പെട്ട ‘അലുവ അതുൽ’ ക്രിമിനൽ ലോകത്ത് അറിയപ്പെട്ടിരുന്നത് തന്റെ വേറിട്ടതും ക്രൂരവുമായ ആക്രമണ ശൈലി കൊണ്ടായിരുന്നു. . ഗുണ്ടാ നേതാവായിരുന്ന ജിം സന്തോഷ് വധക്കേസിൽ ജാമ്യത്തിലിറങ്ങിയശേഷം സ്റ്റേഷനിൽപോയി മടങ്ങുകയായിരുന്നു അതുലിനെ കൊല്ലം കരുനാഗപ്പള്ളിയിൽ വച്ച് കാറിലെത്തിയ സംഘം വെട്ടിക്കൊല്ലുകയായിരുന്നു. എതിരാളികളെ വകവരുത്താൻ കൂടം ഉപയോഗിച്ചിരുന്ന ഇയാൾ, മദ്യമോ മറ്റ് ലഹരിവസ്തുക്കളോ ഉപയോഗിക്കാത്ത വ്യക്തിയായിരുന്നു എന്നത് ഏവരെയും അത്ഭുതപ്പെടുത്തിയിരുന്നു. എന്നാൽ മനുഷ്യരക്തം കാണുന്നതായിരുന്നു അതുലിന്റെ ലഹരി.

2025 മാർച്ച് 27നാണ് പടനായർകുളങ്ങര വടക്ക് കെട്ടിശ്ശേരിൽ കിഴക്കതിൽ വീട്ടിൽ എ.സന്തോഷ് കുമാറെന്ന ജിം സന്തോഷ് കൊല്ലപ്പെട്ടത്. കരുനാഗപ്പളളി, ഓച്ചിറ എന്നീ സ്ഥലങ്ങള്‍ കേന്ദ്രീകരിച്ചുളള രണ്ട് ഗുണ്ടാ സംഘങ്ങള്‍ തമ്മിലുളള വര്‍ഷങ്ങള്‍ നീണ്ട വൈരാഗ്യമായിരുന്നു സന്തോഷ് കൊലപാതകത്തിന് കാരണം. പുലർച്ചെ വടിവാളും കമ്പിപ്പാരയും ഉൾപ്പെടെയുള്ള ആയുധങ്ങളുമായി കാറിൽ എത്തിയ സംഘം ആദ്യം സന്തോഷിന്റെ മാതാവ് ഓമന കിടന്ന മുറിയുടെ കതക് വെട്ടിപ്പൊളിച്ച് ഉള്ളിൽ കടന്നു. ആ മുറിയിൽ സന്തോഷ് ഇല്ലെന്നറിഞ്ഞതോടെ സംഘം തൊട്ടടുത്ത മുറിയുടെ കതക് തകർത്ത് അകത്തു കയറി സന്തോഷിനെ ആക്രമിക്കുകയായിരുന്നു. അക്രമികൾ സ്ഫോടക വസ്തുക്കൾ മുറിയിൽ പൊട്ടിച്ച് ഭീകരാന്തരീക്ഷം സൃഷ്ടിക്കുകയും ചെയ്തു.

മാതാവിന്റെ മുന്നിൽ വച്ചായിരുന്നു അക്രമങ്ങളെല്ലാം. ശരീരത്തിന്റെ പലഭാഗത്തും വെട്ടേറ്റ സന്തോഷ്കുമാർ മരിച്ചെന്നു കരുതി സംഘം മടങ്ങി. ഇതിനു ശേഷം സന്തോഷ്കുമാർ തന്നെയാണ് ആംബുലൻസ് വിളിച്ചത്. ആംബുലൻസ് എത്തി താലൂക്ക് ആശുപത്രിയിൽ എത്തിച്ചപ്പോഴേക്കും മരിച്ചു. സന്തോഷിന്റെ ഭാര്യ രമ്യയും മക്കളായ ഭഗതും വൈഗയും ഈ സമയം തഴവയിലെ വീട്ടിലായിരുന്നു. ഗുണ്ടാ സംഘങ്ങൾ തമ്മിലുള്ള പകയാണ് കൊലപാതകത്തിൽ കലാശിച്ചത്.

സാധാരണ ഗുണ്ടാസംഘങ്ങളിൽ നിന്ന് വ്യത്യസ്തമായി മയക്കുമരുന്നിനോ മദ്യത്തിനോ അടിമയാകാതെ, അതീവ ജാഗ്രതയോടെയും കൃത്യതയോടെയും അക്രമങ്ങൾ പ്ലാൻ ചെയ്തിരുന്നതാണ് അതുലിനെ കൂടുതൽ അപകടകാരിയാക്കിയിരുന്നത്. എതിരാളികളെ കൂടം കൊണ്ട് അടിച്ചു നിലംപരിശാക്കുന്ന രീതിയായിരുന്നു ഇയാൾക്ക് ഉണ്ടായിരുന്നത്. വിവിധ സ്റ്റേഷനുകളിലായി നിരവധി കൊലപാതക ശ്രമം, വധഭീഷണി കേസുകളിൽ പ്രതിയായ അതുൽ, കുറച്ചുകാലമായി നഗരത്തിലെ പ്രധാന ഗുണ്ടാസംഘങ്ങൾക്കിടയിലെ വലിയ ഭീഷണിയായിരുന്നു.

കൊലപാതകം കൂടാതെ എം.ഡി.എം.എ. കേസിലും അതുലും കൂട്ടാളിയും പ്രതികളാണ്. ഒരിക്കൽ, പോലീസ് പിടികൂടാൻ ശ്രമിക്കവേ, ഭാര്യയുടെയും കുഞ്ഞിന്റെയും ഒപ്പം യാത്ര ചെയ്തിരുന്ന അതുൽ, അവരെ വഴിയിൽ ഉപേക്ഷിച്ച് ഓടി രക്ഷപ്പെട്ടിരുന്നു. പോലീസ് വാഹനപരിശോധനയ്ക്കിടെയാണ് സംഭവം. ശേഷം തമിഴ്നാട്ടിൽ നിന്നും പിടികൂടിയ അതുലും കൂട്ടരും കോടതിവളപ്പിൽ റീൽസ് ചിത്രീകരിച്ചതിന്റെ പേരിലും കേസ് നേരിട്ടിരുന്നു.