മുൻമുഖ്യമന്ത്രി ഉമ്മൻ ചാണ്ടിയുടെ ആരോഗ്യനില തൃപ്തികരം; മരുന്നുകളോട് പ്രതികരിക്കുന്നതായും അണുബാധക്കുള്ള ചികിത്സ തുടങ്ങിയതായും ഡോക്ടർമാർ; നെയ്യാറ്റിൻകര നിംസ് ആശുപത്രിയിൽ ആരോഗ്യമന്ത്രിയുടെ സന്ദർശനം

തിരുവനന്തപുരം: ഇന്നലെ അണുബാധയെ തുടർന്ന് നെയ്യാറ്റിൻകര നിംസ് ആശുപത്രിയിൽ പ്രവേശിക്കപ്പെട്ട മുൻ മുഖ്യമന്ത്രി ഉമ്മൻചാണ്ടിയുടെ ആരോഗ്യനില തൃപ്തികരമെന്നും അദ്ദേഹം മരുന്നുകളോട് പ്രതികരിക്കുന്നതായും നിംസ് നെഫ്രോളജി വിഭാഗം മേധാവിയും മെഡിക്കൽ ബോർഡ് ചീഫുമായ ഡോ മഞ്ജു തമ്പി അറിയിച്ചു. അണുബാധക്കെതിരെയുള്ള ചികിത്സയാരംഭിച്ചതായും ആശുപത്രി അധികൃതർ അറിയിച്ചു. രാവിലെ ആരോഗ്യമന്ത്രി വീണാ ജോർജ് ആശുപത്രിയിലെത്തി ഉമ്മൻ ചാണ്ടിയെ സന്ദർശിച്ചിരുന്നു. മുഖ്യമന്ത്രിയുടെ നിർദ്ദേശപ്രകാരമാണ് സന്ദർശനം നടത്തിയതെന്നും ഉമ്മൻചാണ്ടിയുടെ ചികിത്സ ഏകോപിപ്പിക്കുന്നതിനായി മെഡിക്കൽ ബോർഡ് രൂപീകരിച്ചതായും ആരോഗ്യമന്ത്രി മാദ്ധ്യമങ്ങളോട് പറഞ്ഞു. ഉമ്മൻചാണ്ടിയുടെ കുടുംബാംഗങ്ങളുമായി മുഖ്യമന്ത്രി ഇന്നലെ സംസാരിച്ചിരുന്നു.

ആരോഗ്യസ്ഥിതിയെക്കുറിച്ച് മുഖ്യമന്ത്രി പിണറായി വിജയൻ ഉമ്മൻ ചാണ്ടിയുടെ മകൻ ചാണ്ടി ഉമ്മ‍നോട് ഫോണിൽ വിവരങ്ങൾ അന്വേഷിച്ചു. ഇതിനു പിന്നാലെ മുഖ്യമന്ത്രിക്കു നന്ദി അറിയിച്ച് ചാണ്ടി ഉമ്മൻ ഫെയ്സ്ബുക് പോസ്റ്റിട്ടു. ‘അപ്പയുടെ സുഖവിവരം അന്വേഷിച്ചു വിളിക്കുകയും ആരോഗ്യമന്ത്രിയെ ആശുപത്രിയിൽ അയയ്ക്കുകയും ചെയ്യുന്ന പ്രിയങ്കരനായ മുഖ്യമന്ത്രി പിണറായി വിജയനു നന്ദി’ എന്നായിരുന്നു പോസ്റ്റ്. ശ്വാസകോശ അണുബാധക്കുള്ള ചികിത്സ പൂർത്തിയായതിനു ശേഷം ഉമ്മൻ ചാണ്ടിയെ തുടർ ചികിത്സക്കായി ബെംഗളുരുവിലേക്ക് മാറ്റാനാണ് സാധ്യത.