ബലൂൺ ഉപയോഗിച്ച് ചൈന നടത്തിയത് ചാരപ്രവർത്തനം തന്നെ; അവശിഷ്ടങ്ങൾ തിരികെ നൽകില്ലെന്ന് അമേരിക്ക; കടലിൽ നിന്ന് വീണ്ടെടുത്ത ഉപകരണങ്ങൾ പരിശോധിക്കുന്നു

ന്യൂയോർക്ക്: ബലൂൺ ഉപയോഗിച്ച് ചൈന നടത്തിയത് ചാരപ്രവർത്തനം തന്നെയെന്നും തങ്ങൾ വെടിവെച്ചിട്ട നിരീക്ഷണ ബലൂണിന്റെ അവശിഷ്ടങ്ങൾ ചൈനക്ക് കൈമാറില്ലെന്നും അമേരിക്ക. രാജ്യത്തിന്റെ പരമാധികാരത്തെ ചൈന ചോദ്യം ചെയ്തതായും വ്യോമാതിർത്തി ലംഘിച്ച് ദിവസങ്ങളോളം ചൈനീസ് ബലൂൺ അമേരിക്കയിൽ കറങ്ങിനടന്നതായും അമേരിക്ക ആരോപിക്കുന്നു. സൗത്ത് കാരോലിനക്ക് മുകളിൽ വച്ചാണ് അമേരിക്കൻ യുദ്ധ വിമാനങ്ങൾ ചൈനീസ് ബലൂണിനെ ഇന്നലെ വെടിവച്ചിട്ടത്. അത്ലാന്റിക് സമുദ്രത്തിൽ പതിച്ച അവശിഷ്ടങ്ങൾക്കായി അമേരിക്ക തിരച്ചിൽ ഊർജ്ജിതമാക്കി. ചില ഉപകരണങ്ങൾ അമേരിക്ക കണ്ടെടുത്തതായും അത് പരിശോധിച്ച് വരുന്നതായും സൂചനകളുണ്ട്. വീണ്ടെടുത്ത ഉപകരണങ്ങളിൽ നിന്ന് ലഭിച്ച പ്രാഥമിക വിവരങ്ങളിൽ നിന്ന് ബലൂൺ നടത്തിയത് ചാരപ്രവർത്തനം തന്നെയാണ് എന്ന് അമേരിക്ക വിലയിരുത്തുന്നു. അത് കാലാവസ്ഥാ നിരീക്ഷണ ബലൂൺ ആയിരുന്നെന്നും കാറ്റിന്റെ സ്വാധീനത്താൽ ദിശ തെറ്റിയതാണെന്നും ചൈന ഇന്നലെ വിശദീകരിച്ചിരുന്നു.

കാറ്റിന്റെ ദിശയിൽ നിയന്ത്രണമില്ലാതെ സഞ്ചരിക്കുന്ന ബലൂണല്ല മറിച്ച് സ്വയം കൃത്യതയോടെ സഞ്ചരിക്കാൻ കഴിവുള്ള ബലൂണാണിത്. പ്രൊപ്പല്ലർ അടക്കമുള്ള ഉപകരണങ്ങൾ തങ്ങൾ കണ്ടെടുത്തതായും അമേരിക്കൻ നാഷണൽ സെക്യൂരിറ്റി കൗൺസിൽ വക്താവ് പറഞ്ഞു. സ്വന്തമായി വേഗത നിയന്ത്രിക്കാനും ദിശ മാറ്റാനും ഇതിനു കഴിയും. ജെറ്റ് വിമാനങ്ങൾ സഞ്ചരിക്കുന്ന പാതയിലൂടെ പോലും ഈ ബലൂണിന് സഞ്ചരിക്കാൻ കഴിയുമെന്ന് അമേരിക്ക കണ്ടെത്തിയിട്ടുണ്ട്. അമേരിക്കൻ വ്യോമാതിർത്തി ചൈനീസ് ബലൂൺ ഭേദിച്ചത് അമേരിക്ക അതീവ ഗൗരവത്തോടെയാണ് കാണുന്നത് കാരണം അമേരിക്കയുടെ ആണവ കേന്ദ്രങ്ങളിൽ ഒന്നിന് സമീപത്താണ് ബലൂൺ പ്രത്യക്ഷപ്പെട്ടത്. ഇരു രാജ്യങ്ങളും തമ്മിലുള്ള ബന്ധം ഉലയുന്നതിനും ഇത് കാരണമായിട്ടുണ്ട്.