തൃശ്ശൂരിൽ കനത്ത മഴ തുടരുന്നു ! ന​ഗരത്തിലെ ​ഗതാ​ഗതം പൂർണമായും സ്തംഭിച്ചു ; 2 മണിക്കൂർ അതീവജാഗ്രത വേണമെന്ന് കളക്ടറുടെ നിർദേശം

തൃശ്ശൂർ ജില്ലയിൽ കനത്ത മഴ തുടരുന്നു. കഴിഞ്ഞ ഒന്നര മണിക്കൂറായി മഴ നിർത്താതെ പെയ്യുകയാണ്. അടുത്ത 2 മണിക്കൂർ കൂടി ജില്ലയിൽ അതിശക്തമായ മഴ തുടരുമെന്ന് ജില്ലാ കളക്ടർ അറിയിച്ചു. ജനങ്ങൾ അതീവ ജാഗ്രത പുലർത്തണമെന്നും 2 മണിക്കൂറിന് ശേഷം മഴ കുറയുമെന്നും കളക്ടർ അറിയിച്ചു.

നിർത്താതെ മഴ പെയ്യുന്നതിനെ തുടർന്ന് തൃശ്ശൂർ നഗരത്തിലെ താഴ്ന്ന പ്രദേശങ്ങളെല്ലാം വെള്ളത്തിലായിരിക്കുകയാണ്. സ്വകാര്യ ബസുകൾ സർവീസ് നിർത്തിയതിനാൽ യാത്രക്കാർ പലരും ബസ് സ്റ്റോപ്പുകളിൽ കുടുങ്ങിയിരിക്കുകയാണ്. ചുരുക്കം ചില കെഎസ്ആർടിസി ബസുകൾ മാത്രമാണ് ഇന്ന് സർവീസ് നടത്തിയത്. അശ്വിനി ജം​ഗ്ഷൻ, പൂങ്കുന്നം, റെയിൽവേ സ്റ്റേഷൻ പരിസരം തുടങ്ങിയ സ്ഥലങ്ങളിലെല്ലാം വെള്ളക്കെട്ട് രൂപപ്പെട്ടു. അതിനാൽ തന്നെ, ന​ഗരത്തിലെ ​ഗതാ​ഗതം പൂർണമായും സ്തംഭിച്ച നിലയിലാണ്. അതേസമയം, അടുത്ത 3 മണിക്കൂറിൽ തൃശ്ശൂർ ജില്ലയിൽ ഒറ്റപ്പെട്ടയിടങ്ങളിൽ ഇടിമിന്നലോട് കൂടിയ ശക്തമായ മഴയ്‌ക്കും മണിക്കൂറിൽ 40 കിലോമീറ്റർ വരെ വേഗതയിൽ വീശിയേക്കാവുന്ന ശക്തമായ കാറ്റിനും സാധ്യതയുണ്ടെന്ന് കേന്ദ്ര കാലാവസ്ഥ വകുപ്പും മുന്നറിയിപ്പ് നൽകി.