തന്റെ ട്രാൻസ് വിരുദ്ധ അഭിപ്രായങ്ങൾ ഒരിക്കലും ആരെയും വിഷമിപ്പിക്കാൻ ഉദ്ദേശിച്ചിട്ടുള്ളതായിരുന്നില്ല;വർഷങ്ങൾക്ക് ശേഷം വിശദീകരണവുമായി ഹാരിപോർട്ടർ രചയിതാവ് ജെകെ റൗളിംഗ്

ട്രാൻസ്‌ജെൻഡർ കമ്മ്യൂണിറ്റിയെക്കുറിച്ചുള്ള തന്റെ അഭിപ്രായങ്ങളുടെ പേരിൽ കടുത്ത വിമർശനം നേരിട്ട് രണ്ട് വർഷത്തിന് ശേഷം, എഴുത്തുകാരി ജെ കെ റൗളിംഗ് വിശദീകരണവുമായി രംഗത്തെത്തി . റൗളിംഗിന്റെ അഭിപ്രായങ്ങൾ പ്രത്യേകിച്ച് ട്രാൻസ് സ്ത്രീകളെ അവഹേളിക്കുന്നതായി പരക്കെ വിമർശനമുയർന്നിരുന്നു. ഇപ്പോൾ, ‘ദി വിച്ച് ട്രയൽസ് ഓഫ് ജെ കെ റൗളിംഗ്’ എന്ന പേരിൽ ഒരു പുതിയ പോഡ്‌കാസ്റ്റിലൂടെയാണ് എഴുത്തുകാരി വിശദീകരണവുമായി വന്നിരിക്കുന്നത്.

“ഞാൻ ഒരിക്കലും ആരെയും വിഷമിപ്പിക്കാൻ ശ്രമിച്ചിട്ടില്ല. എന്നിരുന്നാലും, എന്റെ അഭിപ്രായം വെളിപ്പെടുത്തിയതിൽ എനിക്ക് അസ്വസ്ഥത തോന്നുന്നില്ല,” പോഡ്‌കാസ്റ്റിന്റെ ട്രെയിലറിൽ റൗളിംഗ് പറഞ്ഞു. മേഗൻ ഫെൽപ്‌സ്-റോപ്പർ അവതാരകനാകുന്ന ‘ദി വിച്ച് ട്രയൽസ് ഓഫ് ജെകെ റൗളിംഗ്’ ഫെബ്രുവരി 21 ന് പ്രീമിയർ ചെയ്യും.

ഹാരി പോട്ടർ എന്ന ഏറ്റവും കൂടുതൽ വിറ്റഴിക്കപ്പെടുന്ന ഫാന്റസി പുസ്തക പരമ്പരയിലൂടെ ആഗോളപ്രശസ്തി നേടിയ റൗളിംഗ്, 2020 ജൂണിൽ ട്രാൻസ്‌ജെൻഡറുകളെക്കുറിച്ചുള്ള ട്വീറ്റുകളുടെ പരമ്പരയിലൂടെ നിരവധി ആരാധകരെ രോഷാകുലരാക്കുകയും അവരുടെ വെറുപ്പ് സമ്പാദിക്കുകയും ചെയ്തു.

വിവാദ ട്വീറ്റുകളുടെ പശ്ചാത്തലത്തിൽ ഹാരിപോർട്ടർ സിനിമകളിലെ സ്ഥിരം അഭിനേതാക്കളായ ഡാനിയൽ റാഡ്ക്ലിഫ്, എമ്മ വാട്സൺ, റൂപർട്ട് ഗ്രിന്റ്, എഡ്ഡി റെഡ്മെയ്ൻ എന്നിവരുൾപ്പെടെ റൗളിംഗിനെതിരെ രൂക്ഷ വിമർശനവുമായി രംഗത്തു വന്നിരുന്നു. മാത്രമല്ല 2021ലെ ‘ഹാരി പോട്ടർ’ സിനിമകളുടെ 20-ാം വാർഷിക ആഘോഷത്തിൽ നിന്നും റൗളിംഗിനെ ഒഴിവാക്കുകയും ചെയ്തിരിന്നു.