‘ലക്ഷങ്ങളുടെ വിശ്വാസം തെറ്റെന്ന് കോടതിക്ക് എങ്ങനെ പറയാനാകും?’; ശബരിമല കേസിൽ സുപ്രീം കോടതിയുടെ നിർണ്ണായക നിരീക്ഷണം

ന്യൂഡൽഹി: ശബരിമല യുവതി പ്രവേശനവുമായി ബന്ധപ്പെട്ട നിയമപോരാട്ടത്തിൽ നിർണ്ണായക വഴിത്തിരിവ്. ലക്ഷക്കണക്കിന് ഭക്തർ പവിത്രമായി വിശ്വസിക്കുന്ന ഒരു ആചാരം തെറ്റാണെന്ന് വിധിക്കാൻ കോടതികൾക്ക് എങ്ങനെ സാധിക്കുമെന്ന് സുപ്രീം കോടതി ചീഫ് ജസ്റ്റിസ് സൂര്യകാന്ത് ചോദിച്ചു. ഒമ്പതംഗ ഭരണഘടനാ ബെഞ്ചിന് മുന്നിൽ തിരുവിതാംകൂർ ദേവസ്വം ബോർഡിന്റെ വാദം നടക്കവേയായിരുന്നു ചീഫ് ജസ്റ്റിസിന്റെ ഈ സുപ്രധാന നിരീക്ഷണം.

ക്ഷേത്രവുമായി ബന്ധമില്ലാത്ത അവിശ്വാസികളാണ് ശബരിമല കേസിലെ ഹർജിക്കാരെന്ന് ജസ്റ്റിസ് നാഗരത്ന വീണ്ടും ഓർമ്മിപ്പിച്ചു. ഇത്തരം ഹർജികൾ ‘അനാവശ്യ ഇടപെടൽ’ ആണെന്നും അവർ നിരീക്ഷിച്ചു. സാമൂഹിക പരിഷ്‌കരണം എന്ന പേരിൽ ഒരു മതത്തിന്റെ അന്തസത്ത ഇല്ലാതാക്കാൻ കഴിയില്ലെന്ന് വ്യക്തമാക്കിയ ജസ്റ്റിസ് നാഗരത്നയുടെ നിലപാടിനോട് ചീഫ് ജസ്റ്റിസും യോജിച്ചു. ഭക്തരുടെ വിശ്വാസത്തെ ചോദ്യം ചെയ്യാൻ കോടതികൾക്കുള്ള അധികാരപരിധിയാണ് ബെഞ്ച് പ്രധാനമായും ചർച്ച ചെയ്തത്.

തിരുവിതാംകൂർ ദേവസ്വം ബോർഡിനായി ഹാജരായ മുതിർന്ന അഭിഭാഷകൻ മനു അഭിഷേക് സിംഗ്വി ശക്തമായ വാദങ്ങളാണ് നിരത്തിയത്. ശബരിമലയിലെ പ്രതിഷ്ഠ ‘നൈഷ്ഠിക ബ്രഹ്മചാരി’ സങ്കൽപ്പത്തിലുള്ളതായതിനാലാണ് നിയന്ത്രണമെന്നും ഇത് ലിംഗവിവേചനമല്ലെന്നും അദ്ദേഹം ചൂണ്ടിക്കാട്ടി. നിശ്ചിത പ്രായപരിധിയിലുള്ള സ്ത്രീകൾക്ക് മാത്രമാണ് നിയന്ത്രണം. വ്രതം എടുത്തു വരുന്ന ആർക്കും അവിടെ പ്രവേശിക്കാം. വർഷങ്ങളായി നിലനിൽക്കുന്ന ഇത്തരം ആചാരങ്ങളെ അനാവശ്യമായി ചോദ്യം ചെയ്യുന്നത് അംഗീകരിക്കാനാവില്ലെന്നും ബോർഡ് കോടതിയെ അറിയിച്ചു.

ആചാരങ്ങൾ പാലിക്കപ്പെടണം എന്ന നിലപാടിൽ ഉറച്ചുനിൽക്കുമ്പോഴും, ജാതിയുടെയോ വർഗ്ഗത്തിന്റെയോ അടിസ്ഥാനത്തിലുള്ള വിവേചനത്തെ അംഗീകരിക്കില്ലെന്നും ദേവസ്വം ബോർഡ് വ്യക്തമാക്കി. ആരാണ് ക്ഷേത്രത്തിൽ പ്രവേശിക്കേണ്ടതെന്ന് അതത് വിഭാഗങ്ങൾ തീരുമാനിക്കണം എന്ന എൻഎസ്എസ് (NSS) അടക്കമുള്ളവരുടെ വാദത്തെ ബോർഡ് എതിർത്തു.

ദേവസ്വം ബോർഡിന്റെ വാദങ്ങൾ പൂർത്തിയായ സാഹചര്യത്തിൽ, കേസിൽ സംസ്ഥാന സർക്കാരിന്റെ വാദം വരും വെള്ളിയാഴ്ച നടക്കും. ചീഫ് ജസ്റ്റിസിന്റെ പുതിയ നിരീക്ഷണങ്ങൾ നിലവിലെ യുവതി പ്രവേശന വിധി പുനഃപരിശോധിക്കപ്പെടുമെന്ന ശക്തമായ സൂചനയാണ് നൽകുന്നത്.