മുംബൈയിൽ വൻ ലഹരിവേട്ട ! 1,745 കോടി വിലമതിക്കുന്ന 349 കിലോ കൊക്കെയ്ൻ പിടികൂടി

ദില്ലി : രാജ്യത്തെ ലഹരിക്കടത്ത് ശൃംഖലകൾക്കെതിരെയുള്ള പോരാട്ടത്തിൽ നിർണ്ണായക നേട്ടവുമായി നർക്കോട്ടിക് കൺട്രോൾ ബ്യൂറോ (NCB). മുംബൈയിൽ നടത്തിയ വൻ റെയ്ഡിൽ അന്താരാഷ്ട്ര വിപണിയിൽ ഏകദേശം 1,745 കോടി രൂപ വിലമതിക്കുന്ന 349 കിലോഗ്രാം കൊക്കെയ്ൻ പിടിച്ചെടുത്തു. അന്താരാഷ്ട്ര ലഹരിക്കടത്ത് സംഘങ്ങളെ ലക്ഷ്യമിട്ട് എൻസിബി നടത്തിയ നീക്കമാണ് ഇപ്പോൾ വലിയ വിജയത്തിൽ എത്തിയിരിക്കുന്നത്.

ലഹരി മാഫിയകളെ വേരോടെ പിഴുതെറിയാനുള്ള സർക്കാരിന്റെ ദൃഢനിശ്ചയമാണ് ഈ നേട്ടത്തിലൂടെ വ്യക്തമാകുന്നതെന്ന് കേന്ദ്ര ആഭ്യന്തര മന്ത്രി അമിത് ഷാ പറഞ്ഞു. ഒരു ചെറിയ ലഹരിമരുന്ന് കൈമാറ്റത്തിൽ നിന്ന് തുടങ്ങി അന്താരാഷ്ട്ര ശൃംഖലയെ തന്നെ തകർത്ത എൻ.സി.ബി സംഘത്തിന്റെ പ്രവർത്തനത്തെ അദ്ദേഹം പ്രശംസിച്ചു. ഈ വൻ വിജയത്തിൽ എൻ.സി.ബിയിലെ മുഴുവൻ ഉദ്യോഗസ്ഥരെയും അദ്ദേഹം അഭിനന്ദിക്കുകയും ചെയ്തു.

അന്താരാഷ്ട്ര ഭീകരൻ ദാവൂദ് ഇബ്രാഹിമിന്റെ അടുത്ത അനുയായിയും ലഹരിക്കടത്ത് കേസ് പ്രതിയുമായ സലിം ദോളയെ തുർക്കിയിൽ നിന്ന് ഇന്ത്യയിലെത്തിച്ചതിന് തൊട്ടുപിന്നാലെയാണ് ഈ വൻ വേട്ട നടന്നത് എന്നത് ശ്രദ്ധേയമാണ്. വരും ദിവസങ്ങളിൽ കൂടുതൽ അറസ്റ്റുകളും അന്വേഷണങ്ങളും ഈ കേസിൽ ഉണ്ടായേക്കുമെന്നാണ് സൂചന.