ഇന്ത്യ- പാക് സംഘർഷം അവസാനിപ്പിച്ചത് ഞാൻ !!നൊബേൽ സമ്മാനം എനിക്ക് അവകാശപ്പെട്ടത് ! വീണ്ടും അവകാശ വാദവുമായി ട്രമ്പ്

ന്യൂയോര്‍ക്ക്: ഇന്ത്യ-പാക് സംഘർഷം അവസാനിപ്പിച്ചത് താനാണെന്നും സമാധാനത്തിനുള്ള നൊബേൽ സമ്മാനം തനിക്ക് അവകാശപ്പെട്ടതെന്നും ഡൊണാൾഡ് ട്രമ്പ് . ഐക്യരാഷ്ട്രസഭയിൽ നടത്തിയ പ്രസംഗത്തിലാണ് ട്രമ്പ് തന്റെ അവകാശവാദങ്ങൾ ആവർത്തിച്ചത്. ഐക്യരാഷ്ട്രസഭയുടെ കഴിവുകേടിനെയും ട്രമ്പ് വിമർശിച്ചു.

‘വെറുംവാക്കുകള്‍ യുദ്ധങ്ങള്‍ അവസാനിപ്പിക്കില്ല. ഐക്യരാഷ്ട്രസഭയുടെ ഉദ്ദേശ്യം എന്താണ്? അതിന് വളരെ വലിയ സാധ്യതകളുണ്ടെന്ന് താന്‍ എപ്പോഴും പറഞ്ഞിട്ടുണ്ട്. എന്നാൽ പക്ഷേ ആ സാധ്യതകള്‍ക്കൊത്ത് ഉയരാന്‍ അതിന് സാധിക്കുന്നില്ല. തന്റെ രണ്ടാം ഭരണകാലത്ത് ഇതുവരെ ഏഴ് യുദ്ധങ്ങള്‍ അവസാനിപ്പിച്ചു.

കംബോഡിയയും തായ്‌ലാൻഡും; കൊസോവോയും സെര്‍ബിയയും; പാകിസ്ഥാനും ഇന്ത്യയും; ഇസ്രായേലും ഇറാനും; ഈജിപ്തും എത്യോപ്യയും; അര്‍മേനിയയും അസര്‍ബൈജാനും; ഡിആര്‍ കോംഗോയും റുവാണ്ടയും തമ്മിലുള്ള സംഘര്‍ഷങ്ങള്‍ താന്‍ അവസാനിപ്പിച്ചു. മറ്റൊരു പ്രസിഡന്റും ഇതിനടുത്ത് വരുന്ന ഒന്നും ചെയ്തിട്ടില്ലെന്നും അദ്ദേഹം പറഞ്ഞു. ഇവയിലൊന്നിലും യുഎന്‍ ‘സഹായിക്കാന്‍ ശ്രമിക്കുക പോലും ചെയ്തില്ല.”- ട്രമ്പ് പറഞ്ഞു