വനിതാ ട്വന്റി 20 ലോകകപ്പിന് ഇന്ന് തുടക്കം

സിഡ്‌നി : വനിതാ ലോകകപ്പ് ക്രിക്കറ്റിന് ഇന്ന് ഓസ്‌ട്രേലിയയില്‍ തുടക്കം. നിലവിലെ ചാമ്പ്യന്‍മാരായ ഓസ്‌ട്രേലിയയാണ് ഉദ്ഘാടനമത്സരത്തില്‍ ഇന്ത്യയുടെ എതിരാളി. ഇന്ത്യയുടെ ലക്ഷ്യം കന്നിക്കിരീടം തന്നെ. മത്സരം ഉച്ചയ്ക്ക് 1.30 മുതല്‍ സിഡ്‌നിയിലാണ് മത്സരം. 10 ടീമുകളാണ് ഓസ്‌ട്രേലിയയില്‍ നടക്കുന്ന ലോകകപ്പില്‍ പങ്കെടുക്കുന്നത്. ഓസ്‌ട്രേലിയ, ഇംഗ്ലണ്ട്, ന്യൂസീലന്‍ഡ്, ഇന്ത്യ, പാകിസ്താന്‍, ശ്രീലങ്ക, ദക്ഷിണാഫ്രിക്ക, വെസ്റ്റിന്‍ഡീസ്, ബംഗ്ലാദേശ്, തായ്‌ലാന്‍ഡ്. ആദ്യമായാണ് തായ്‌ലാന്‍ഡ് ലോകകപ്പ് കളിക്കുന്നത്.

2009ല്‍ തുടങ്ങിയ ലോകകപ്പില്‍ ഇതുവരെ ഇന്ത്യയ്ക്ക് ഫൈനലില്‍ എത്താന്‍പോലും ആയിട്ടില്ല. 2009, 2010, 2018 വര്‍ഷങ്ങളില്‍ സെമിഫൈനല്‍വരെയെത്തിയതാണ് ഇതുവരെയുള്ള മികച്ച പ്രകടനം.ടീമുകളെ അഞ്ചുവീതമുള്ള രണ്ടു ഗ്രൂപ്പുകളാക്കി തിരിച്ചാണ് മത്സരങ്ങള്‍ നടക്കുക. ഗ്രൂപ്പുകളിലെ ടീമുകള്‍ പരസ്പരം മത്സരിക്കും. ഓരോ ഗ്രൂപ്പിലും കൂടുതല്‍ പോയിന്റ് നേടുന്ന രണ്ടു ടീമുകള്‍ വീതം സെമിഫൈനലില്‍ എത്തും.

കഴിഞ്ഞ മൂന്നു വര്‍ഷത്തിനിടെ വനിതാ ക്രിക്കറ്റിന്റെ ജനപ്രീതി കുത്തനെ ഉയര്‍ന്നിരുന്നു. 2017-ല്‍ ഇന്ത്യ ഫൈനലിലെത്തിയ ഏകദിന ലോകകപ്പ് ടെലിവിഷനില്‍ കണ്ടത് 18 കോടിയോളം ആളുകളാണ്. 2018 വനിതാ ട്വന്റി 20 ലോകകപ്പ് ഇരുനൂറോളം രാജ്യങ്ങളില്‍ തത്സമയം സംപ്രേക്ഷണം ചെയ്തിരുന്നു.