ബാറ്റിങ്ങിൽ തകർന്നടിഞ്ഞ് പാകിസ്ഥാൻ

ട്രെന്റ്ബ്രിജ്: ലോകകപ്പില്‍ ആദ്യ മത്സരത്തിനിറങ്ങിയ പാകിസ്താന് നാണംകെട്ട തുടക്കം. ആദ്യം ബാറ്റ് ചെയ്ത പാക് ടീം 105 റൺസിന് ഓൾഔട്ടായി. ട്വന്‍റി 20 മൽസരത്തെ അനുസ്മരിപ്പിച്ച മൽസരത്തിൽ വെറും 21.4 ഓവറിൽ മാത്രമാണ് പാകിസ്ഥാന് ക്രീസിൽ നിൽക്കാനായത്.വിൻഡീസിന്റെ ഷോട്ട് ബോളുകളെ പ്രതിരോധിക്കാനാകാതെ പതറിയ പാകിസ്താന്‍ ബാറ്റ്‌സ്മാന്‍മാരെയാണ് ട്രെന്റ് ബ്രിഡ്ജില്‍ കണ്ടത്.

22 റൺസ് വീതം നേടിയ ഫഖർ സമാനും ബാബർ അസമുമാണ് പാകിസ്താന്‍റെ ടോപ് സ്കോറർമാർ. 5.4 ഓവറിൽ നാലു വിക്കറ്റ് വീഴ്ത്തിയ ഒഷെയ്ൻ തോമസാണ് പാകിസ്താനെ തകർത്തത്. ഹോൾഡർ അഞ്ച് ഓവറിൽ മൂന്ന് വിക്കറ്റും റസൽ മൂന്നോവറിൽ രണ്ട് വിക്കറ്റും വീഴ്ത്തി.സമാന്‍ 16 പന്തില്‍ രണ്ടു ബൗണ്ടറിയും ഒരു സിക്‌സും സഹിതവും അസം 33 പന്തില്‍ രണ്ടു ബൗണ്ടറി സഹിതവുമാണ് 22 റണ്‍സ് നേടിയത്. ഇവരടക്കം നാല് പേര്‍ക്ക് മാത്രമാണ് രണ്ടക്കം കടക്കാനായത്. മുഹമ്മദ് ഹഫീഫ് 24 പന്തില്‍ 14 രണ്‍സും വഹാബ് റിയാസ് 11 പന്തില്‍ 18 റണ്‍സും നേടി.

ഇമാം ഉള്‍ ഹഖ് (11 പന്തില്‍ രണ്ട്), ഹാരിസ് സൊഹൈല്‍ (11 പന്തില്‍ എട്ട്), സര്‍ഫറാസ് അഹമ്മദ് (12 പന്തില്‍ എട്ട്), ഇമാദ് വസിം (മൂന്നു പന്തില്‍ ഒന്ന്), ഷതാബ് ഖാന്‍ (പൂജ്യം), ഹസന്‍ അലി (ഒന്ന്) എന്നിവര്‍ കളിയിൽ തീര്‍ത്തും നിറംമങ്ങി. മൂന്നു വിക്കറ്റ് വീഴ്ത്തിയ ക്യാപ്റ്റന്‍ ജേസണ്‍ ഹോല്‍ഡറും രണ്ടു വിക്കറ്റ് വീഴ്ത്തിയ ആന്ദ്രെ റസലും ഒരു വിക്കറ്റ് സ്വന്തമാക്കിയ ഷെല്‍ഡന്‍ കോട്രലും ചേര്‍ന്നതോടെ പാകിസ്താന്റെ പോരാട്ടം 105ല്‍ അവസാനിച്ചു. നേരത്തെ, ടോസ് നേടിയ വെസ്റ്റ് ഇന്‍ഡീസ് നായകന്‍ ജേസണ്‍ ഹോള്‍ഡര്‍ ഫീല്‍ഡിങ് തിരഞ്ഞെടുക്കുകയായിരുന്നു.