ഇന്ന് കുംഭാഷ്ടമി; ഭക്തർക്ക് അപൂർവ ദർശനപുണ്യം

ഇന്ന് കുംഭാഷ്ടമി. ഭഗവാൻ ശിവശങ്കരനെയും പുത്രനായ സുബ്രഹ്മണ്യനെയും ഒന്നിച്ചു എഴുന്നെള്ളിക്കുന്ന അപൂർവ ദർശനം ലഭിക്കുന്ന ദിനമാണ് ഇന്ന്. മാശി അഷ്ടമി, കിഴക്കോട്ട് അഷ്ടമി എന്നീ പേരിൽ അറിയുന്ന കുംഭാഷ്ടമി നാളിൽ വൈക്കത്തപ്പനും ഉദയനാപുരത്തപ്പനും കൊയ്ത്തു കഴിഞ്ഞുള്ള വിളവെടുപ്പ് കാണുവാനും പാട്ടം പിരിക്കുവാനും വേണ്ടി എഴുന്നള്ളുന്നുവെന്ന് ഐതിഹ്യം.

വേദ പണ്ഡിതൻമാർ പങ്കെടുക്കുന്ന ഏകാദശി രുദ്രഘൃത കലശാഭിഷേകം, ശ്രീബലി, പ്രാതൽ എന്നിവയും ഉണ്ടാവും. വൈക്കത്തപ്പനും ഉദയനാപുരത്തപ്പനും ഒന്നിച്ചുള്ള എഴുന്നള്ളിപ്പാണ് പ്രധാനം.

ഉദയനാപുരം ക്ഷേത്രത്തിലെ എഴുന്നള്ളിപ്പ് വൈകിട്ട് 4ന് ശേഷം വൈക്കം ക്ഷേത്രത്തിൽ എത്തും. വൈക്കത്തപ്പനെയും പുറത്തേക്ക് എഴുന്നള്ളിക്കും വിവിധ വാദ്യമേളങ്ങൾ അകമ്പടിയാകും.

അതേസമയം ക്ഷേത്രത്തിന് പ്രദക്ഷിണം പൂർത്തിയാക്കി കൊടിമര ചുവട്ടിൽ എത്തുന്നതോടെ ഭക്തർ നിറദീപം തെളിയിച്ച് നിറപറയൊരുക്കും. എഴുന്നള്ളിപ്പ് കടന്നു വരുന്ന ഭാഗങ്ങളിൽ കുലവാഴകളും കുരുത്തോലയും കരിക്കിൻ കുലകളും മുത്തുക്കുടകളും വർണക്കുടകളും വച്ച് അലങ്കരിക്കും. എഴുന്നള്ളിപ്പുകൾ കിഴക്കേ ഗോപുര കടന്ന് വാഴമന, കള്ളാട്ട്ശേരി, കൂർക്കശ്ശേരി എന്നിവിടങ്ങളിലേക്ക് പോകും. ഈ പ്രദേശങ്ങളിൽ ഇറക്കി പൂജയും നിവേദ്യവുമുണ്ട്.

മാത്രമല്ല ഇവിടങ്ങളിൽ നിറപറയൊരുക്കിയാണ് സ്വീകരിക്കുന്നത്. തിരിച്ചെഴുന്നള്ളിപ്പ് ആറാട്ട് കുളങ്ങരയിൽ എത്തുന്നതോടെ സ്വർണക്കുടയും ആലവട്ട-വെഞ്ചാമര അലങ്കാരങ്ങളും ഉപയോഗിക്കും. വരവേൽപിനും സ്വീകരണ ചടങ്ങുകൾക്കും ശേഷം രാത്രി 2നു വൈക്കം ക്ഷേത്രത്തിൽ എത്തുന്നതോടെ അഷ്ടമിവിളക്ക് ആരംഭിക്കും. എഴുന്നള്ളത്ത് ക്ഷേത്രത്തിന് ഒരു പ്രദക്ഷിണം പൂർത്തിയാക്കി കൊടിമര ചുവട്ടിൽ എത്തുന്നതോടെ യാത്രയയപ്പ് ചടങ്ങ് നടക്കും.

(കടപ്പാട്)