തിരുവനന്തപുരം: ട്രാക്ക് നവീകരണം നടക്കുന്നതിനാൽ ട്രെയിൻ ഗതാഗതത്തിൽ മാറ്റമുണ്ടെന്ന് ഇന്ത്യൻ റെയിൽവേ വ്യക്തമാക്കി.തൃപ്പൂണിത്തുറ-മുളന്തുരുത്തി, ഓച്ചിറ-കരുനാഗപ്പള്ളി സെക്ഷനുകളിൽ ട്രാക്ക് നവീകരണ ജോലികൾ നടക്കുന്നതിനാൽ ട്രെയിനുകൾ റദ്ദാക്കലടക്കമുള്ള ഗതാഗത നിയന്ത്രണമേർപ്പെടുത്തിയതായി റെയിൽവേ അറിയിച്ചു.ഇന്ന് സർവീസ് നടത്തുന്ന കൊച്ചുവേളി-ലോകമാന്യതിലക് സൂപ്പർഫാസ്റ്റ് കോട്ടയം-മുളന്തുരുത്തി സെക്ഷനിൽ ഒരു മണിക്കൂർ വൈകും.
അതേസമയം ഇന്ന് കൊല്ലത്തു നിന്ന് ആരംഭിക്കുന്ന കൊല്ലം-എറണാകുളം മെമു കായംകുളത്ത് യാത്ര അവസാനിപ്പിക്കും. എറണാകുളത്തുനിന്ന് പുറപ്പെടുന്ന എറണാകുളം-കൊല്ലം മെമു കായംകുളത്ത് യാത്ര അവസാനിപ്പിക്കും. മാർച്ച് 26ലെ തിരുവനന്തപുരം-കണ്ണൂർ ജനശതാബ്ദി, എറണാകുളം-ഷൊർണൂർ മെമു, എറണാകുളം-ഗുരുവായൂർ എക്സ്പ്രസ് (06448) എന്നിവയും മാർച്ച് 27ലെ കണ്ണൂർ-തിരുവനന്തപുരം ജനശതാബ്ദിയും റദ്ദാക്കി.
