ടി20 ലോകകപ്പ്: ഇന്ത്യ-ന്യൂസിലന്‍ഡ് രണ്ടാം സന്നാഹ മത്സരം നാളെ

ബ്രിസ്ബേന്‍: ടി20 ലോകകപ്പിലെ ഇന്ത്യയുടെ അവസാന സന്നാഹ മത്സരം നാളെ ബ്രിസ്ബേനില്‍ നടക്കും. ആദ്യ മത്സരത്തില്‍ ഓസ്ട്രേലിയക്കെതിരെ ആവേശജയം നേടിയതിന്‍റെ ആത്മവിശ്വാസത്തിലാണ് ഇന്ത്യ നാളെ ഇറങ്ങുന്നത്. ഓസ്ട്രേലിയക്കെതിരെ അവസാന ഓവറില്‍ മുഹമ്മദ് ഷമിയുടെ അവിശ്വസനീയ ബൗളിംഗിന്‍റെയും വിരാട് കോലിയുടെ അസാമാന്യ ഫീല്‍ഡിംഗിന്‍റെയും മികവിലാണ് ഇന്ത്യ ജയിച്ചു കയറിയത്. 23ന് പാക്കിസ്ഥാനെതിരെ നടക്കുന്ന സൂപ്പര്‍ 12 പോരാട്ടത്തിന് മുമ്പുള്ള ഇന്ത്യയുടെ അവസാന സന്നാഹമ മത്സരമാണ് നാളത്തേത്.

നാളെ ന്യൂസിലന്‍ഡിനെതിരെ ഇറങ്ങുമ്പോള്‍ മുഹമ്മദ് ഷമിയെ ഇന്ത്യ ആദ്യ ഇലവനില്‍ കളിപ്പിച്ചേക്കും. ആദ്യ മത്സരത്തില്‍ തിളങ്ങിയ സൂര്യകുമാര്‍ യാദവിനും നാളെ ബാറ്റിംഗില്‍ വിശ്രമം കൊടുക്കാന്‍ സാധ്യതയുണ്ട്. സൂര്യകുമാര്‍ കളിച്ചില്ലെങ്കില്‍ പകരം റിഷഭ് പന്തോ ദീപക് ഹൂഡയോ ബാറ്റിംഗ് നിരയില്‍ നാലാം സ്ഥാനത്തിറങ്ങും. സൂര്യകുമാര്‍ കളിച്ചാല്‍ കെ എല്‍ രാഹുലോ വിരാട് കോലിയോ രോഹിത് ശര്‍മയോ വിശ്രമെടുക്കാനുള്ള സാധ്യതയുമുണ്ട്.