ഇറാൻ റെവല്യൂഷണറി ഗാർഡ് ഇന്റലിജൻസ് മേധാവി മജീദ് ഖദെമി കൊല്ലപ്പെട്ടു ! പശ്ചിമേഷ്യയിൽ യുദ്ധം കടുക്കുന്നു

ടെഹ്‌റാൻ : ഇറാൻ റെവല്യൂഷണറി ഗാർഡ് ഇന്റലിജൻസ് മേധാവി ജനറൽ മജീദ് ഖദെമി കൊല്ലപ്പെട്ടു. തിങ്കളാഴ്ച പുലർച്ചെ ഇറാൻ തലസ്ഥാനമായ ടെഹ്‌റാനിൽ അമേരിക്കയും ഇസ്രയേലും സംയുക്തമായി നടത്തിയ വ്യോമാക്രമണത്തിലാണ് ഖദെമി കൊല്ലപ്പെട്ടതെന്ന് ഇറാൻ ഔദ്യോഗിക മാദ്ധ്യമങ്ങൾ സ്ഥിരീകരിച്ചു. ഇസ്‌ലാമിക് റെവല്യൂഷണറി ഗാർഡ് കോർപ്സിന്റെ (IRGC) ഇന്റലിജൻസ് വിഭാഗം തലവനായ ഖദെമിയുടെ മരണം ഇറാൻ സൈന്യത്തിന് ഏറ്റ കനത്ത പ്രഹരമാണ്. മുൻപ് കൊല്ലപ്പെട്ട ഉദ്യോഗസ്ഥന് പകരമായി അടുത്തിടെയാണ് ഖാദേമി ചുമതലയേറ്റത്. ആക്രമണത്തിന്റെ ഉത്തരവാദിത്തം അമേരിക്കയ്ക്കും ഇസ്രയേലിനുമാണെന്ന് ഐആർജിസി നേരിട്ട് ആരോപിച്ചു.

പുലർച്ചെയുണ്ടായ ആക്രമണത്തിൽ ടെഹ്‌റാനിലെ നിരവധി കേന്ദ്രങ്ങളിൽ സ്ഫോടനങ്ങൾ റിപ്പോർട്ട് ചെയ്തിട്ടുണ്ട്. ആസാദി സ്ക്വയറിന് സമീപവും ഷെരീഫ് യൂണിവേഴ്സിറ്റി ഓഫ് ടെക്നോളജിക്ക് അടുത്തും കറുത്ത പുക ഉയരുന്ന ദൃശ്യങ്ങൾ പുറത്തുവന്നു. ജനവാസ മേഖലകളിൽ ഉൾപ്പെടെ ഉണ്ടായ ഈ വ്യോമാക്രമണങ്ങളിൽ ഇരുപത്തിയഞ്ചിലധികം പേർ കൊല്ലപ്പെട്ടതായാണ് വിവരം. ഖദെമിയുടെ വധത്തിന് പിന്നാലെ ഇസ്രയേലിന് നേരെ ഇറാൻ ശക്തമായ മിസൈൽ ആക്രമണം നടത്തി. വടക്കൻ ഇസ്രയേൽ നഗരമായ ഹൈഫയിലുണ്ടായ സ്ഫോടനത്തിൽ രണ്ട് പേർ കൊല്ലപ്പെട്ടു. കൂടാതെ കുവൈറ്റ്, യുഎഇ, സൗദി അറേബ്യ തുടങ്ങിയ രാജ്യങ്ങൾക്ക് നേരെയും ഇറാന്റെ മിസൈലുകളും ഡ്രോണുകളും എത്തിയതോടെ ഈ രാജ്യങ്ങൾ തങ്ങളുടെ വ്യോമ പ്രതിരോധ സംവിധാനങ്ങൾ സജ്ജമാക്കി.

ലോകത്തെ പ്രധാന എണ്ണ വ്യാപാര പാതയായ ഹോർമുസ് കടലിടുക്കിനെ ചൊല്ലിയുള്ള തർക്കം ഇതോടെ പുതിയ തലത്തിലേക്ക് കടന്നു. കടലിടുക്ക് ഉടൻ തുറക്കണമെന്ന് ഇറാനോട് ആവശ്യപ്പെട്ട അമേരിക്കൻ പ്രസിഡന്റ് ഡോണാൾഡ് ട്രമ്പ്, അല്ലാത്തപക്ഷം ഇറാന്റെ അടിസ്ഥാന സൗകര്യങ്ങൾക്ക് നേരെ കനത്ത ആക്രമണം ഉണ്ടാകുമെന്ന് മുന്നറിയിപ്പ് നൽകി. എന്നാൽ തങ്ങളുടെ രാജ്യത്തിന് നേരെയുള്ള ആക്രമണം തുടരുകയാണെങ്കിൽ മേഖലയിലുടനീളമുള്ള ശത്രുതാപരമായ കേന്ദ്രങ്ങളെ ലക്ഷ്യം വയ്ക്കുമെന്ന് ഇറാൻ സൈനിക ഉദ്യോഗസ്ഥർ തിരിച്ചടിച്ചു. സംഘർഷം രൂക്ഷമായതോടെ ആഗോള വിപണിയിൽ എണ്ണവില കുതിച്ചുയരുകയാണ്.

അതേസമയം, യുദ്ധം അവസാനിപ്പിക്കാനുള്ള നയതന്ത്ര നീക്കങ്ങളും സജീവമായി നടക്കുന്നുണ്ട്. ഈജിപ്ത്, തുർക്കി എന്നീ രാജ്യങ്ങളുടെ മധ്യസ്ഥതയിൽ തയ്യാറാക്കിയ വെടിനിർത്തൽ കരാർ അമേരിക്കയ്ക്കും ഇറാനും കൈമാറി. ഉടനടി വെടിനിർത്തൽ പ്രഖ്യാപിക്കുക, 45 ദിവസത്തെ ചർച്ചകൾ നടത്തുക, ഹോർമുസ് കടലിടുക്ക് തുറന്നുകൊടുക്കുക എന്നിവയാണ് ഈ നിർദ്ദേശത്തിലുള്ളത്. എന്നാൽ ഈ സമാധാന പദ്ധതിയോട് ഇരുരാജ്യങ്ങളും ഇതുവരെ ഔദ്യോഗികമായി പ്രതികരിച്ചിട്ടില്ല. പശ്ചിമേഷ്യയിലെ സാഹചര്യം ഓരോ നിമിഷവും കൂടുതൽ വഷളായിക്കൊണ്ടിരിക്കുന്നത് ലോകരാഷ്ട്രങ്ങളെയാകെ ആശങ്കയിലാഴ്ത്തുന്നു.