സംസ്ഥാനത്തേക്ക് കൂടുതൽ പാസഞ്ചർ ട്രെയിനുകൾ; എക്‌സ്പ്രസ് നിരക്ക് ബാധകം

പത്തനംതിട്ട: സംസ്ഥാനത്ത് കോവിഡ് കാരണം നിർത്തലാക്കിയ പാസഞ്ചർ ട്രെയിനുകൾ പുനസ്ഥാപിക്കുന്നു. കൊല്ലം-എറണാകുളം മെമു(കോട്ടയം വഴി), എറണാകുളം-കൊല്ലം മെമു(ആലപ്പുഴ വഴി), കൊല്ലം-ആലപ്പുഴ-കൊല്ലം പാസഞ്ചർ, കൊച്ചുവേളി-നാഗർകോവിൽ പാസഞ്ചർ എന്നീ ട്രെയിനുകൾ ജൂലൈ 11നും ഷൊർണൂർ-തൃശൂർ പാസഞ്ചർ ജൂലൈ 3 മുതലും തൃശൂർ-കണ്ണൂർ പാസഞ്ചർ ജൂലൈ 4 മുതലും സർവീസ് പുനരാംഭിക്കും.

അൺറിസർവ്ഡ് എക്‌സ്പ്രസ് ആയിട്ടായിരിക്കും പാസഞ്ചർ ട്രെയിനുകൾ പുനസ്ഥാപിക്കുക. എക്‌സ്പ്രസ് നിരക്ക് ബാധകമായിരിക്കുമെങ്കിലും കൗണ്ടറുകളിൽ നിന്ന് ടിക്കറ്റ് ലഭിക്കും. കൊല്ലം-ആലപ്പുഴ അൺറിസർവ്ഡ് എക്‌സ്പ്രസ് ഞായർ ഒഴികെയുള്ള ദിവസങ്ങളിൽ രാവിലെ 9.05ന് കൊല്ലത്ത് നിന്ന് പുറപ്പെട്ട് 11.45ന് ആലപ്പുഴയിലെത്തും.

ഉച്ചയ്‌ക്ക് 1.50ന് ആലപ്പുഴയിൽ നിന്ന് പുറപ്പെട്ട് 3.45ന് കൊല്ലത്ത് എത്തും. നാഗർകോവിൽ-കൊച്ചുവേളി അൺറിസർവ്ഡ് എക്‌സ്പ്രസ് രാവിലെ 7.55ന് പുറപ്പെട്ട് രാവിലെ 10.10ന് കൊച്ചുവേളിയിലെത്തും. ഉച്ചയ്‌ക്ക് 1.40ന് കൊച്ചുവേളിയിൽ നിന്ന് പുറപ്പെടുന്ന ട്രെയിൻ 4.25ന് നാഗർകോവിലിൽ എത്തും.