കൊല്ലം എസ് എൻ കോളേജ് അലുംനി യു.എ.ഇ. ചാപ്റ്റർ പ്രസിദ്ധീകരിക്കുന്ന പൂർവ്വ വിദ്യാർത്ഥികളുടെ ഓർമ്മകുറിപ്പുകളുടെ സമാഹാരമായ ‘പ്രിയ പരിചിത നേരങ്ങൾ ‘ കവർ പ്രകാശനം നടന്നു.

ദുബായ് : കൊല്ലം എസ്.എൻ. കോളേജ് അലുംനി യു.എ.ഇ. ചാപ്റ്റർ പ്രസിദ്ധീകരിക്കുന്ന പൂർവ്വ വിദ്യാർത്ഥികളുടെ ഓർമ്മകുറിപ്പുകളുടെ സമാഹാരമായ ‘പ്രിയ പരിചിത നേരങ്ങൾ’ എന്ന പുസ്തകത്തിന്റെ കവർ പ്രകാശനം പ്രമുഖ മാധ്യമ പ്രവർത്തകനും യു.എ.ഇ.മെട്രോ വാർത്ത സ്പെഷ്യൽ കറസ്പോണ്ടന്റുമായ റോയ് റാഫേൽ നിർവ്വഹിച്ചു. പ്രമുഖ വ്യവസായിയും മെന്ററും ജീവകാരുണ്യ പ്രവർത്തകനുമായ നസീർ വെളിയിൽ ഏറ്റുവാങ്ങി. കോളേജ് അലുംനികളുടെ കൂട്ടായ്മയായ അക്കാഫ് അസോസിയേഷൻ പദ്ധതിയായ എൻറെ കലാലയം സീരിസിൽ പ്രസിദ്ധീകരിക്കുന്ന പുസ്തകങ്ങളുടെ ഭാഗമായി കൂടിയാണ് ഇതിന്റെ പ്രസിദ്ധീകരണം.

അലുംനി പ്രസിഡണ്ട് റസ്‌ല അംനാദ് അദ്ധ്യക്ഷത വഹിച്ച യോഗത്തിൽ അക്കാഫ് അസോസിയേഷൻ പ്രസിഡന്റ് പോൾ.ടി. ജോസഫ്, ജനറൽ സെക്രട്ടറി ദീപു.എ.എസ്.,എഴുത്തുകാരി ഷീല പോൾ, അക്കാഫ് ലിറ്റററി ക്ലബ് കൺവീനർ ജെറോം തോമസ്, അക്കാഫ് ലീഗൽ ക്ലബ് കൺവീനർ അഡ്വ: നജുമുദീൻ, ഫെബിൻ, ലക്ഷ്‌മി ഷിബു, സഞ്ജു, ബിബിൻ രാജൻ, ഷിബു ആർ.ജി. എന്നിവർ ആശംസകൾ നേർന്നു.

അലുംനി സഹ ഭാരവാഹികളായ കമൽ രാജേന്ദ്രൻ, സിയാദ് ഹാഷിം തുടങ്ങിയവർ നേതൃത്വം നൽകി. ഹരിതം ബുക്‌സ് പ്രസിദ്ധീകരിക്കുന്ന ഈ പുസ്‌തകത്തിന്റെ എഡിറ്റർമാർ റസ്‌ല അംനാദ് , ഷിബു.ആർ.ജി. എന്നിവരാണ്. അലുംനി സെക്രട്ടറി അനൂപ് ബാബുദേവൻ സ്വാഗതവും ട്രഷറർ ഷിബു നന്ദിയും രേഖപ്പെടുത്തി.