കോഴിക്കോട്ട് തെരുവുനായയുടെ ആക്രമണം; വാക്‌സിനെടുത്തിട്ടും വീട്ടമ്മ മരിച്ചു

കോഴിക്കോട്: പേരാമ്പ്ര കൂത്താളിയിൽ തെരുവ് നായയുടെ കടിയേറ്റ വീട്ടമ്മ വാക്‌സിനെടുത്തിട്ടും മരിച്ചു. പുതിയേടത്ത് ചന്ദ്രിക (53) യാണ് മരിച്ചത്. ചികിത്സയിലിരിക്കെ കോഴിക്കോട് മെഡിക്കൽ കോളേജ് ആശുപത്രിയിൽ വച്ചായിരുന്നു മരണം. കഴിഞ്ഞ മാസം 21 നാണ് ചന്ദ്രികയുടെ മുഖത്ത് തെരുവ് നായയുടെ കടിയേറ്റത്. ഉടൻ തന്നെ ആശുപത്രിയിലെത്തി വേണ്ട പ്രതിരോധ മരുന്നുകൾ എടുത്തിരുന്നു. കൂടാതെ പേവിഷബാധക്കെതിരെ ക്യത്യമായ വാക്സീനുകളും ചന്ദ്രിക എടുത്തിരുന്നതായി ബന്ധുക്കൾ അറിയിച്ചു.

എന്നാൽ പത്ത് ദിവസം മുമ്പ് ഇവർക്ക് പെട്ടന്ന് പനിയും അണുബാധയുമുണ്ടാവുകയായിരുന്നു. പേവിഷബാധയുടെ ലക്ഷണങ്ങളും പ്രകടിപ്പിച്ചു. ഇതോടെയാണ് കോഴിക്കോട് മെഡിക്കൽ കോളേജ് ആശുപത്രിയിലെ ഡോക്ടർമാർ സംശയം പ്രകടിപ്പിച്ചതെന്നാണ് മെഡിക്കൽ കോളേജ് അധികൃതരിൽ നിന്നും ലഭിച്ച വിവരം. അതേസമയം ചന്ദ്രികക്ക് ഒപ്പം മറ്റ് നാല് പേരെയും തെരുവ് നായ കടിച്ചിരുന്നുവെങ്കിലും ആർക്കും ഇതുവരെ രോഗലക്ഷണങ്ങളില്ല. ഇതാണ് സംശയത്തിനിടയാക്കുന്നത്.

ഇവരെ കടിച്ച നായക്ക് പേവിഷബാധയുണ്ടെന്ന് നേരത്തെ സ്ഥിരീകരിച്ചിരുന്നു. ചന്ദ്രികക്ക് പേവിഷ ബാധ ഉണ്ടായോ എന്നതിൽ പരിശോധന ഫലങ്ങൾ വരാനുണ്ടെന്ന് ആരോഗ്യവകുപ്പ് അധികൃതർ അറിയിച്ചു. അതേസമയം, സംസ്ഥാനത്ത് നായയുടെ കടിയേറ്റവർ, വാക്സീനെടുത്തിട്ടും മരിക്കുന്ന രണ്ടാമത്തെ സംഭവമാണ് ഇപ്പോ റിപ്പോർട്ട് ചെയ്തിരിക്കുന്നത്.