ലോക്‌സഭാ തെരഞ്ഞെടുപ്പ് പരസ്യപ്രചാരണം അവസാനിച്ചു !അവസാനഘട്ട പോളിങ് മറ്റന്നാൾ

ദില്ലി: ലോക്‌സഭാ തെരഞ്ഞെടുപ്പിന്റെ അവസാനത്തെയും ഏഴാമത്തെയും ഘട്ട വോട്ടെടുപ്പിന്റെ പരസ്യ പ്രചാരണത്തിന് കൊടിയിറങ്ങി. ഏഴ് ഘട്ടങ്ങളിലായി 74 ദിവസം നീണ്ട പരസ്യ പ്രചാരണത്തിനാണ് ഇന്ന് വൈകുന്നേരം അഞ്ച് മണിയോടെ കൊടിയിറങ്ങിയത്. മറ്റന്നാൾ നടക്കുന്ന അവസാന ഘട്ട പോളിംഗില്‍ പഞ്ചാബ്, ഹിമാചല്‍ പ്രദേശ് ചണ്ഡിഗഡ് യു പി, ബംഗാള്‍, ബിഹാര്‍, ഝാര്‍ഖണ്ഡ്, ഒഡിഷ എന്നിവിടങ്ങളിലെ 57 മണ്ഡലങ്ങളിൽ ജനം വിധിയെഴുതും. മൂന്ന് ദിവസങ്ങൾക്ക് ശേഷം ജൂൺ നാലിനാണ് വോട്ടെണ്ണൽ.

മൂന്നാം സര്‍ക്കാരിന്‍റെ സത്യപ്രതിജ്ഞാ ചടങ്ങടക്കം ആസൂത്രണം ചെയ്ത് പ്രധാനമന്ത്രി നരേന്ദ്രമോദി ആത്മവിശ്വാസത്തിലാണ്. പത്ത് വർഷങ്ങൾക്കിടയിൽ നടപ്പാക്കാൻ സാധിച്ച വികസന പദ്ധതികൾ ജനങ്ങളിൽ നിന്ന് അനുകൂല തീരുമാനം ഉണ്ടാക്കാൻ സഹായിക്കും എന്നാണ് ബിജെപിയും എൻഡിഎ മുന്നണിയും കരുതുന്നത്.

ഇക്കുറി കര്‍ത്തവ്യപഥില്‍ സത്യപ്രതിജ്ഞാ ചടങ്ങ് നടത്താനാണ് നീക്കം. മുന്‍കാലങ്ങളില്‍ എണ്ണായിരം പേര്‍ വരെ ചടങ്ങിനെത്തിയിരുന്നെങ്കില്‍ പങ്കാളിത്തം കൂട്ടാനാണ് ചടങ്ങ് കര്‍ത്തവ്യ പഥിലേക്ക് മാറ്റുന്നത്. തത്സമയ സംപ്രേഷണത്തിന് ദൂരദര്‍ശന്‍റെ 100 ക്യാമറകള്‍ സജ്ജമാക്കും. 2014 ലും, പത്തൊന്‍പതിലും ഫലം വന്ന് 10 ദിവസത്തിനുള്ളില്‍ സത്യപ്രതിജ്ഞ നടന്നിരുന്നു.