ചാർട്ടേഡ് അക്കൗണ്ടൻ്റിനെ കാണാൻ, സ്വപ്നയും ശിവശങ്കറുമെത്തിയത് ബാഗിൽ കെട്ടു കണക്കിന് പണവുമായി; വേണുഗോപാൽ പേടിച്ചുപോയി

കൊച്ചി: സ്വർണക്കടത്ത് കേസിൽ മുഖ്യമന്ത്രിയുടെ മുൻ പ്രിൻസിപ്പൽ സെക്രട്ടറി എം ശിവശങ്കർ നൽകിയ മുൻകൂർ ജാമ്യാപേക്ഷ കോടതി ഇന്ന് കൊച്ചി എൻഐഎ പ്രത്യേക കോടതി പരിഗണിക്കും. അന്വേഷണത്തോട് പൂർണമായും സഹകരിച്ചിട്ടുണ്ടെന്നും, കേസിൽ ഇതുവരെ 11 തവണയായി നൂറ് മണിക്കൂറിലേറെ അന്വേഷണ ഏജൻസികൾ തന്നെ ചോദ്യം ചെയ്തതായും ശിവശങ്കർ നൽകിയ ഹർജിയിൽ വ്യക്തമാക്കുന്നു. എന്നാൽ തന്നെ പ്രതി ചേർക്കാൻ ഇതുവരെ തെളിവുകൾ ലഭിച്ചിട്ടില്ല. ആവശ്യപ്പെട്ടാൽ ഇനിയും ഹാജരാകാൻ തയ്യാറാണെന്നും, ഇക്കാര്യങ്ങൾ പരിഗണിച്ച് മുൻകൂർ ജാമ്യം അനുവദിക്കണമെന്നുമാണ് ഹർജിയിലെ ആവശ്യം.

അതേസമയം അക്കൗണ്ടന്റിനെ കാണാൻ ശിവശങ്കറും സ്വപ്ന സുരേഷും വീട്ടിലെത്തിയത് ബാഗ് നിറയെ പണവുമായെന്ന് വെളിപ്പെടുത്തി എൻഫോഴ്സ്മെന്റ് വകുപ്പ് രംഗത്ത് വന്നിട്ടുണ്ട്. ശിവശങ്കർ നൽകിയ മുൻകൂർ ജാമ്യാപേക്ഷയെ എതിർത്ത് ഹൈക്കോടതിയിൽ നൽകിയ വിശദീകരണത്തിലായിരുന്നു എൻഫോഴ്സ്മെന്റിന്റെ ഈ വെളിപ്പെടുത്തൽ.

ബാഗിൽ 30 ലക്ഷം രൂപയുമായാണ് ഇരുവരും വന്നതെന്നും, ആ പണം കൈകാര്യം ചെയ്യാൻ താൻ മടിച്ചുവെന്നും വേണുഗോപാൽ മൊഴി നൽകിയതായി എൻഫോഴ്‌സ്‌മെന്റ് വിഭാഗം അറിയിച്ചു. പണം സത്യസന്ധമായ സ്രോതസ്സിൽ നിന്ന് ആണെന്ന് സ്വപ്നം വിശദീകരിച്ചപ്പോൾ ലോക്കറിൽ വയ്ക്കാനാണ് താൻ നിർദേശിച്ചതെന്ന് വേണുഗോപാൽ പറഞ്ഞതായും ഇ.ഡി പറയുന്നു. സംഭാഷണം നടക്കുമ്പോഴെല്ലാം ശിവശങ്കർ കൂടെയുണ്ടായിരുന്നെന്നും വിശദീകരണത്തില്‍ വ്യക്തമാക്കുന്നുണ്ട്.