കോവിഡ് ഭീഷണി: സ്‌കൂളുകള്‍ അടച്ചു,മതപരമായ കൂടിച്ചേരലുകൾക്ക് വിലക്ക്; കർശന നിയന്ത്രണവുമായി മധ്യപ്രദേശ്

ഭോപ്പാൽ: സംസ്ഥാനത്ത് കോവിഡ് വ്യാപനം രൂക്ഷമായി വർധിക്കുന്ന സാഹചര്യത്തില്‍ സ്‌കൂളുകള്‍ അടയ്ക്കാനൊരുങ്ങി മധ്യപ്രദേശ് സര്‍ക്കാര്‍. ഇതിന്റെ ഭാഗമായി ജനുവരി 31 വരെയാണ് സ്‌കൂളുകള്‍ അടച്ചിടുക.

അതേസമയം മതപരമായ കൂടിച്ചേരലുകളും വിലക്കിയിട്ടുണ്ട്. എന്നാൽ ഇന്നത്തെ മകര സംക്രാന്തി ആഘോഷങ്ങളെ നിയന്ത്രണത്തില്‍ നിന്ന് ഒഴിവാക്കി.

ലോകത്ത് മൂന്നാം തരംഗം പിടിമുറുക്കുമ്പോൾ രാജ്യത്ത് കഴിഞ്ഞ 24 മണിക്കൂറിനുള്ളില്‍ കൊവിഡ് കേസുകളില്‍ 6.7 ശതമാനത്തിന്റെ വര്‍ധന. പ്രതിദിന കോവിഡ് രോഗികളുടെ എണ്ണം രണ്ടര ലക്ഷം കടന്നു. ഏറ്റവും കൂടുതൽ പേർക്ക് കൊവിഡ് സ്ഥിരീകരിച്ചത് മഹാരാഷ്ട്രയിലാണ്. 24 മണിക്കൂറിനിടെ 315 മരണങ്ങളും റിപ്പോർട്ട് ചെയ്തതോടെ ആകെ മരണം 4,85,350 ആയി ഉയർന്നു. കോവിഡിന്റെ പുതിയ വകഭേദമായ ഓമിക്രോൺ ബാധിച്ചവരുടെ എണ്ണം 5752ല്‍ എത്തി. പ്രതിദിന ടെസ്റ്റ് പോസിറ്റിവിറ്റി നിരക്ക് 14.78 ശതമാനമാണ്. ഇന്നലെ 1,09,345 പേര്‍ രോഗമുക്തി നേടി.

അതേസമയം ആരോഗ്യ തയ്യാറെടുപ്പ് അവലോകനം ചെയ്യുന്നതിനും കോവിഡ് വാക്സിനേഷന്‍ പുരോഗതി അവലോകനം ചെയ്യുന്നതിനുമായി വ്യാഴാഴ്ച പ്രധാനമന്ത്രി നരേന്ദ്ര മോദി മുഖ്യമന്ത്രിമാരുമായും ലഫ്റ്റനന്റ് ഗവര്‍ണര്‍മാര്‍/സംസ്ഥാന/കേന്ദ്ര ഭരണ പ്രദേശങ്ങളിലെ ഭരണാധികാരികളുമായും ഒരു കൂടിക്കാഴ്ച നടത്തിയിരുന്നു. വൈറസിനെ തോല്‍പ്പിക്കാന്‍ രാജ്യം സന്നദ്ധത നിലനിര്‍ത്തേണ്ടതുണ്ടെന്ന് പ്രധാനമന്ത്രി നരേന്ദ്ര മോദി ചൂണ്ടിക്കാട്ടി.