കേന്ദ്രമന്ത്രി വി മുരളീധരന്റെ വീടിനു നേരെ ആക്രമണം നടത്തിയ പ്രതി പിടിയിൽ; ജനൽ തകർത്ത് അകത്ത് കയറാൻ ശ്രമിച്ച ദൃശ്യങ്ങൾ സിസിടിവി യിൽ; അക്രമം കാട്ടിയത് പയ്യന്നൂർ സ്വദേശി

കേന്ദ്രമന്ത്രി വി.മുരളീധരന്റെ ഉള്ളൂരിലെ വീട് ആക്രമിച്ച കേസിലെ പ്രതി പിടിയിലായി. തിരുവനന്തപുരം ശ്രീകാര്യത്ത് ഹോട്ടൽ ജീവനക്കാരനായ പയ്യന്നൂര്‍ സ്വദേശി മനോജാണ് പോലീസിന്റെ പിടിയിലായത്. 10 വര്‍ഷം മുമ്പാണ് ഇയാള്‍ തിരുവനന്തപുരത്ത് ജോലിക്കായി എത്തിയത്. ഇയാളെ പോലീസ് ചോദ്യം ചെയ്‌തുവരികയാണ്. ആക്രമണോദ്ദേശ്യം വ്യക്തമല്ല. അതേസമയം ഇയാൾ മാനസിക രോഗിയാണെന്നാണ് പോലീസ് ഭാഷ്യം

ഇന്നലെ രാത്രി 12.30ഓടെയാണ് മനോജിനെ പൊലീസ് കസ്റ്റഡിയിലെടുത്തത്. മെഡിക്കല്‍ കോളജ് സിഐയുടെ നേതൃത്വത്തില്‍ രൂപീകരിച്ച പ്രത്യേക അന്വേഷണ സംഘമാണ് പ്രതിയെ കസ്റ്റഡിയിലെടുത്തത്. അന്വേഷണസംഘവും കണ്‍ട്രോള്‍ റൂം വെഹിക്കിളും സംയുക്തമായി നടത്തിയ പരിശോധനയ്‌ക്കൊടുവിലാണ് പ്രതി പിടിയിലായത്. കേന്ദ്രമന്ത്രിയുടെ വീടിനു നേരെയുണ്ടായ ആക്രമണം വൻ സുരക്ഷാ വീഴ്‌ചയാണെന്നും കേന്ദ്രമന്ത്രിയുടെ സുരക്ഷയിൽ ആഭ്യന്തര വകുപ്പ് നിരന്തരം വീഴ്ചവരുത്തുകയാണെന്നും ബിജെപി ആരോപിച്ചിരുന്നു. മന്ത്രിയുടെ ആളില്ലാത്ത വീട്ടിൽ പ്രതി ഏറെനേരം തങ്ങിയതായും ജനൽ ചില്ലുകൾ തകർത്ത് അകത്തുകയറാൻ ശ്രമിച്ചതായും സിസിടിവി ദൃശ്യങ്ങളിൽ നിന്ന് വ്യക്തമായിരുന്നു.