2022ലെ ആദ്യ മൻ കി ബാത്ത് ഇന്ന്; രാവിലെ 11.30ന് പ്രധാനമന്ത്രി രാജ്യത്തെ അഭിസംബോധന ചെയ്യും

ദില്ലി: 2022ലെ ആദ്യ മൻ കി ബാത്ത് (Mann Ki Baat)ഇന്ന്. പ്രധാനമന്ത്രി നരേന്ദ്രമോദിയുടെ പ്രതിമാസ റേഡിയോ പരിപാടിയായ ‘മൻ കി ബാത്തിന്റെ’ 85-ാം പതിപ്പ് ആണ് ഇന്ന് പ്രക്ഷേപണം ചെയ്യുന്നത്. രാവിലെ 11.30നാണ് പ്രധാനമന്ത്രി മൻ കി ബാത്തിലൂടെ രാജ്യത്തെ അഭിസംബോധന ചെയ്യുക. എല്ലാ മാസവും അവസാന ഞായറാഴ്ചയാണ് മൻ കി ബാത്ത് പ്രക്ഷേപണം ചെയ്യുക. 2014 ഒക്ടോബർ മൂന്നിനായിരുന്നു പ്രധാനമന്ത്രിയുടെ ആദ്യ മൻ കി ബാത്ത് നടന്നത്.

എന്നാൽ ഇത്തവണത്തെ മൻ കി ബാത്തിന് ചില സവിശേഷതകളുണ്ട്. ഇന്ത്യയുടെ സ്വാതന്ത്ര്യത്തിനായി രാഷ്‌ട്രപിതാവ് മഹാത്മാഗാന്ധി നൽകിയ സംഭാവനകളെ ആദരിക്കുന്നതിനായി ഗാന്ധിജിയുടെ രക്തസാക്ഷി ദിനത്തിലാണ് ഇത്തവണ അഭിസംബോധന നടക്കുന്നത്. 2022 വർഷത്തെ ആദ്യത്തെ മൻ കി ബാത്ത് ആണിത്. രാജ്യത്തെമ്പാടുമുള്ള ജനങ്ങൾക്ക് മൻകി ബാത്ത് കേൾക്കുന്നതിനുള്ള സൗകര്യം വിവിധയിടങ്ങളിൽ ബിജെപി സജ്ജമാക്കിയിട്ടുണ്ട്. കഴിഞ്ഞ ഡിസംബർ 26നായിരുന്നു ഒടുവിൽ പ്രധാനമന്ത്രി മൻ കി ബാത്തിലൂടെ രാജ്യത്തെ അഭിസംബോധന ചെയ്തത്. അതേസമയം കോവിഡ് വ്യാപനം ഉൾപ്പെടയുള്ള വിഷയങ്ങളെക്കുറിച്ച് പ്രധാനമന്ത്രി ജനങ്ങളോട് ഇന്ന് സംസാരിച്ചേക്കും.